CEBU, Philippines - Usa ka drayber nga walay helmet, namatay, samtang talandugon usab ang kahimtang sa angkas niini dihang ang motorsiklo nga ilang gisakyan midasmag sa usa ka mahogay tree didto sa kurbadahon nga bahin sa karsada sa barangay Calape, lungsod sa Daanbantayan, niadtong Sabado sa alas 2:00 sa hapon.
Ang namatay mao si Ricardo Fuentes, 49, minyo, nga taga Sitio Panabilan, barangay Nailon, lungsod sa Bogo, samtang ang angkas niini mao si Rogelio Megabon Jr, 22, nga taga barangay Kawit, lungsod sa Medillen.
Si PO2 Dario Cuyoca sa Daanbantayan Police Station mibutyag sa Banat News, ang mga biktima gikan sa amihanang bahin paingon sa Poblacion, Daanbantayan, dihang pag-abot sa usa ka blind curve sa highway sa Calape, wala kini ka paliko og tarong sa iyang motor ug hinuon midasmag kini sa dakong punoan sa mahogany sa daplin sa karsada.
Matud sa mga nakasaksi nga milupad og pipila ka metros ang drayber ug nag-una ang ulo niini sa pagtugpa sa yuta ug ang kakusog nga pagkabusdak ug pagkaantog sa iyang bagolbagol nga walay helmet maoy nakabugto sa iyang kinabuhi. - Darrel A. Carumba (BANAT NEWS)