CEBU, Philippines - Nasabak sa lubot ug milapos sa paa sa usa sa duha ka mga vendor nga nasamdan sa saag nga bala didto sa dalan Alviola, sa Villagonzalo II, barangay Tejero, ning dakbayan sa Sugbo sa miaging hapon.
Si PO3 Geoffrey Gutual sa kapolisan sa dakbayan sa Sugbo miila sa mga biktima nga sila si Annabelle Zabala, 23, ug Veronica Osiones, 51 nga pulos taga Villagonzalo II.
Samtang ang suspetsadong nagpaboto og armas de fuego kansang bala mitaroy sa lubot ni Zabal ug sa kamot ni Osiones mao si Joseph Morata, hingkod, nga silingan sa mga biktima.
Nasayran sa kapolisan nga si Morata ug si Randy Amores nga iyang silingan, nag-away niadtong higayona sa palibot sa lugar diin namaligya og binignit ang mga biktima dihang milanit sa iyang armas de fuego si Morata ug gitirohan si Amores.
Apan abtik kaayong nakalihay ang naulahi, hinungdan nga ang bala didto motaroy sa lubot nga milapos sa paa ni Zabala ug milahos sa kamot ni Osiones.
Samtang gihatod ngadto sa Velez General Hospital ang duha ka biktima, misutoy usab og panagan sila si Morata ug Amores nga maoy gipangita karon sa kapolisan. - Lesley Caminade (BANAT NEWS)