CEBU, Philippines - Mga balay sa barangay Lagtang sa dakbayan sa Talisay nalubong sa tubig baha nga dunay dalang lapok tungod sa kakusog sa bunok sa uwan kagahapon sa kaadlawon, susama gihapon ang nasinati sa pipila ka barangay sa dakbayan sa Sugbu.
Si Kapitan Celiapo Cabuenas sa pakighinabi niini sa Banat News kagahapon nagkanayon nga sobra sa 20 ka balay ang nasudlan og tubig sa baha kansang mga appliances ug kabtangan nangaguba tungod sa baha.
Apan sa oras sa pagsuwat niining balita wala pa kahatag og tukmang kantidad sa danyos ang kapitan kay wala pa sila mahuman sa pagpanglista sa mga nabiktima.
Matud ni Cabuenas nga ang baha naggikan sa duha ka subdivision nga nahimutang sa ibabaw nga bahin sa iyang barangay.
Sa kakusog sa bul-og sa tubig ang pader sa usa ka junkshop nga gipanag-iya ni William Tan diha sa sitio Ilang-ilang ang nabungkag ug tungod sa pagkabungkag ang tanang tubig nga naggikan sa ibabaw midagayday sulod sa maong junkshop.
Sa laing bahin, si Talisay City Administrator Richel Bacaltos sa pakighinabi niini sa Banat News kagahapon mipasusi na sa barangay Lagtang ug karong adlawa makigtigom siya sa city engineer nga si Audie Bacasmas, Christine Homez, hepe sa City Planning and Development Coordinator (CPDC) ug kang Konsehal Rodolfo Cabigas nga maoy tsirman sa komitiba sa imprastraktura.
Matud ni Bacaltos nga mangayo siya sa ulahing kalambo-an sa mga gipahigayong meeting tali sa maong mga department heads ug sa mga opisyal o representante sa mga subdivision nga nahimutang sa Lagtang kabahin sa nahisgutang problema.
Sa dakbayan sa Sugbu, pipila sa mga residente sa barangay Pari-an ang nahigmata gumikan sa kalit nga pagsaka sa tubig baha ilabi na sa dalan Ibarra, Bonifacio, Sikatuna, Simuon ug Jakosalem.
Pipila sa mga panimalay ang nasudlan og tubig gumikan sa paglapaw sa baha diha sa kanal kini bisan paman sa kanunay'ng pagpanghabwa sa mga basurang nagbara niini. - Brenda Batuto (BANAT NEWS)