CEBU, Philippines - Tungod sa kusog nga paghapak sa hangin ug pagbunok sa uwan duha ka kongkretong paril sa dakbayan sa Sugbu ug sa Talisay ang mihagsa sa duha ka panimalay ug mikalas og tulo ka kinabuhi.
Milagro usab nga nasalbar ang 3-anyos nga kamanghurang anak sa managtiayon nga si Georgina Marie nga maayong pagkatabon sa lawas sa amahan kinsa gituuhang daling mihapa sa anak aron kini panalipdan dihang nahugno na ang paril sa ilang balay.
Base sa imbestigasyon nila ni SPO1 Arturo Andales ug PO2 Lino Diez ang insidente nahitabo mga alas 5:40 sa buntag kagahapon dihang ang pader sa balay nga gipanag-iya ni Martino Piala natumba.
Gibasol ang pagkatumba sa maong kongkretong paril sa kusog nga uwan nga gidunganan sa kusog nga hangin hinungdan nga kini nahagsa ug ang balay sa pamilyang Flores nga nangatulog pa nianang tungura diha sa pikas nga bahin sa paril.
Ang balay sa pamilyang Flores ginama ra sa mga gaay hinungdan nga nabungkag kini dayon ug nangalubong silang buhi atol sa paghagsa, ang mga kabanay na nila maoy mitabang sa pagkubkob ug gidali sila og dala sa Talisay City District Hospital.
Apan sila si Regie ug Divine Grace gideklarar nang dead on arrival samtang si Geraldine gibalhin dayon sa Vicente Sotto Memorial Medical Center tungod sa grabeng kadaut nga naangkon sa lawas.
Si Felipa Solana, hepe sa city social welfare sa pakighinabi sa Banat News nagkanayon nga ang siyudad mohatag og burial, medical ug food assistance ngadto sa pamilyang Flores.
Samtang sa dakbayan sa Sugbu, patay usab ang usa ka ginang sa susamang trahedya diha sa sitio Tabay-Lawom sa barangay Tisa dihang nahagsa ang konkretong paril sa usa ka subdivision sa ilang panimalay kagahapon alas-3 sa kaadlawon.
Patay nang naugkat si Wilma Parma, 49, molupyo sa maong dapit human mahan-uki sa maong paril ug sa ilang panimalay, samtang naatol ang paghagsa pagpanggawas sa iyang banang si Danilo ug duha ka mga anak nga dalaga nga misusi unta sa kasikas sa gawas.
Matud pang Danilo nangatulog sila niadtong tungura dihang dunay mipaka sa ilang balay hinungdan nga nahigmata silang tanan ug sa pagtuong gisudlan sila og kawatan daling nakagawas ang duha nila ka mga anak nga sila si Alona, 22, ug Marlyn,16, kinsa misinggit pagpangayo og tabang.
Si Danilo nga daling mibalikwas og bangon ug migawas nakugang nalang nga kalit nahugno ang ilang balay ug natabunan na kini sa maong paril lakip na ang iyang asawa.
“Ingon akong asawa nga pagbantay Dan, mao ra to paka dayon, wala na siya (Wilma) motingog unya nalabay ko,” sumala ni Danilo.
Pasado alas singko na sa buntag nga niabot ang mga rescuers gikan sa Bureau of Fire Protection nga gisundan sa Emergency Rescue Unit Foundation.
Ang pader giingong gipanag-iya sa Arcenas Subdivision nga natumpag tungod usab sa kusog nga pagbunok sa uwan kagahapon sa kaadlawon.
Gipasalig hinuon sa chairman sa Cebu City Coordinating Council (CCDCC) Konsehal Gerry Carillo, nga hatagan og hinabang sa kagamhanan sa dakbayan ang biktima. Gipahibawo usab sa konsehal nga ang City government mo-issue og cease and desist order ngadto sa developer sa Arcenas subdivision aron pagsuspenso sa site development ug kini magpabilin hangtud walay ihatag nga rehabilitation program ang developer nga maaprubahan sa dakbayan.
Nidugang ang konsehal nga ila usab nga susihon kun unsa ang liability sa kontraktor sa subdivision ug kun kini rehistrado ba sa siyudad.
Gimando na ni Carillo ang pagpabakwit sa ubang mga molupyo duol sa nahitaboan samtang gihakot pa ang debris sa pader ug ang nakankan nga yuta. - Uban sa report nila ni Elly Bolonos ug Lesley Caminade (BANAT NEWS)