'All Terrain Vehicle' may warrant of seizure na
CEBU, Philippines - Miluwat na og Warrant of Seizure and Detention (WSD) si OIC District Collector Maximo Reyes sa Bureau of Customs sa Sugbo sa usa ka sakyanan nga buot untang ipalusot dinhi sa Sugbu sa milabay’ng bulan.
Kini mao ang All Terrain Vehicle nga gisulod sa usa ka 20 footer- van nga walay mga papeles gikan sa Estados Unidos.
Matud pa ni Reyes nga ang pagpayuhot sa maong sakyanan nakalapas sa Tariff and Customs Code of the Philippines.
Hinuon matud pa ni Reyes nga ang consignee sa maong sakyanan nga mao ang LANTRO PHILS INC. makakuha lang og balik niini kun bayran nila ang tukmang buhis sa maong sakyanan.
Apan gibaharan ni Reyes nga kun dili bayran sa tag-iya ang buhis niini, imbarguhon ug ibaligya pabor sa gobyerno aron itapak ang halin sa bayranan sa buhis sa maong kargamento.
Ang All Terrain vehicle usa ka matang sa sakyanan nga susama sa motorsiklo nga adunay upat ka ligid ug gibanabana nga nagkantidad kini og P300 mil.
Nasakpan ang maong kargamento dihang gisusi sa taga Custom ang container van nga gisudlan sa mga butang nga iya sa LANTRO diha sa Cebu International Port niadtong Hulyo 17, 2009, diin wala nila hibasahe sa manifesto ang nahisgutang sakyanan. (Bong Soriano) (BANAT NEWS)
- Latest
- Trending
