Seawall sa Talisay sige'g kaguba

CEBU, Philippines - Si Talisay City Administrator Richel Bacaltos mipasabot kagahapon nga ang gitukod nga sea wall sa baybayon sa barangay Dumlog, dakbayan sa Talisay niadtong tuig 2007 nga giamotan og 5,900 ka sakong semento sa Kapitolyo dugay rang nakompleto.

Miingon si Bacaltos nga gituman gyud nila ang sugyot ni Gobernador Gwendolyn Garcia nga adto itarok ang seawall sa sitio Romahan kay mao kini rumbohanan sa mga higanteng bawod sa panahon nga magdaot ang tiyempo.

Gigastohan sa kagamhanan sa lalawigan og P2.3 milyones , apan dihang gilampornas kini sa mga dagkong bawod gumikan sa nagsunodsunod nga bagyo human kini makompleto, nangagusbat dayon ang maong seawall.

Busa niadtong 2008, gipaayo na usab kini sa kagamhanan sa lalawigan ug gigastohan na usab og P1.1 ka milyon, diin mikapin sa 5,000 ka sakong   semento ang naggamit sa maong rehabilitasyon .

Apan gidimalas na usab ang maong sea wall kay samtang wala pa mahuman a ang pagpaayo niini, gikusokuso na usab sa laing higanteng mga bawod dala sa bagyo nga miigo sa lalawigan ug nagusbat na usab kini.

Busa laing P6 milyones na usab ang dugang gigasto sa kagamhanan sa lalawigan aron mahingpit na usab ang kaayohan sa maong sea wall.

Matud pa sa taga sitio Litmon, barangay Dumlog nga murag wala pa matawo sa kalibotan ang maayong laki nga enhinyero nga makapatukod og sea wall nga dili na maguba sa bawod diha sa lapyahan sa baybayon sa Dumlog.

Ang nakapait niini kay dihang gipangitaan si Kapitan Charles Basillote sa mga resibo sa gipamalit niyang semento, wala na kini makahatag sa maong mga dokumento.

Maoy hinungdan nga pintok kaayo ang pasidaan ni Gobernador Garcia nga kung dili makapakita ang mga local nga opisyal og mga papeles bahin sa gigastohan nila sa gihinabang salapi sa Kapitolyo, manubag sila niini unya dili na gyud usab sila hatagan pa og dugang hinabang sa kagamhanan sa lalawigan.   (BANAT NEWS)