Habalhabal drivers sa Talisay ipatawag

CEBU, Philippines - Mga drayber sa habal-habal sa dakbayan sa Talisay gikatakdang ipatawag sa konseho sa siyudad tungod sa reklamo batok kanila sa mga drayber sa multicab nga dunay rotang Tabunok-Jaclupan.

Si Konsehal Edward Alesna, tsirman sa Committee on Laws sa pakighinabi niini sa Banat News kagahapon nagkanayon nga niadtong Martes niining semanaha nadawat nila ang petisyon sa United Camp 4-Jaclupan Multicab Operators and Drivers Association (UCJ-MODA).

Ang nahisgutang mga drayber mireklamong naapektahan ang ilang kinitaan tungod sa mga habal-habal nga nagbiyahe diha sa ilang rota.

Ang nahisgutang reklamo ang gipirmahan sa 50 ka mga drayber nga pulos mipalit og prangkisa sa Land Transportation Franchising and Regulatory Board (LTFRB).

Niadtong Nobiyembre 11, 2004 ang konseho sa siyudad ang mipasar og ordinansa sa pag-regulate sa operation sa mga habal-habal apan matud ni Alesna nga susihon niya kung naaprobahan ba kini ngadto sa provincial board.

Kahinumduman nga ang UCJ-MODA ang miduso usab og reklamo ngadto sa Land Transportation Office (LTO) sa buhatan ni Assistant Secretary Arturo Lomibao kinsa mimando kang director Raul Aguilus paghimo og report.

Apan tungod sa kawalay aksyon miduso og reklamo ang mga drayber ngadto sa Ombudsman batok sa direktor. Si Aguilus dihang gikuhaan og habig sa Banat News nagkanayon nga naglisod sila og tubag sa suwat reklamo sa maong mga drayber tungod kay wala kini kompletong return address.

Sa laing bahin, si SPO4 Henry Obiso, hepe sa Talisay city traffic division sa pakighinabi niini sa Banat News mibutyag nga kagahapon sa mga alas 10:00-11:00 sa buntag ang mga sakop sa LTO nagpahigayon og operation batok sa mga habal-habal nga miresulta sa pagkasikop sa gibana-banang sobra sa 300 ka mga habal-habal ang nag-operate diha sa siyudad.

Si Obiso mibutyag usab nga pipila sa mga drayber sa habal-habal mihangyo kaniya kun asa sila mamahimong makapundo wala na mamalik sa dihang iyang gipangitaa’g rehistro sa ilang mga motor. - Brenda Batuto (BANAT NEWS)