Mi-piyansa gibirahan namatay

CEBU, Philippines - Gibuk-an sa iyang ulo diha sa atubangang bahin sa Cebu City Jail nga nahimutang sa barangay Kalunasan ang usa ka gipasanginlang tulisan nga nakapiyansa kagahapon ala-una pasado sa hapon nga daw susama sa pamaagi sa mga vigilante kapin duha ka tuig na ang nakalabay.

Ang gipusil ug napatay mao si Jeromy Polistico 34, taga Poblacion 3, Clarin, Misamis Occidental kinsa nakaangkon og daghang samad pinusilan sa ulo ug kalawasan gikan sa kalibre .45 ug .9mm nga armas sa upat ka wala mailhing mamumuno nga sakay og duha ka motorsiklo.

Si Polistico maoy nagsilbing driver sa iyang mga kaubang tulisan nga sila si Noel Davis, Frederick Ybañez, Jennifer Enriquez ug Kirby Abanilla human sila madakpi niadtong milabay’ng buwan diha sa barangay Punta Princesa ning dakbayan.

Si Enriquez una nang nakapiyansa pipila ka adlaw human kini mapasakai og kaso.

Sila maoy gitumbok nga mitulis sa alahera nga si Jennifer De la Cerna kinsa nakuhaan sa iyang P7.5 milyones nga balor sa mga alahas.

Usa sa saksi nga didto sa lugar mibutyag sa mga tigbalita nga ang biktimang si Polistico nagkuyog sa iyang abogadong si Atty. Jesus Feliciano naniudto sa usa ka tindahan atbang sa Cebu City Jail.

Dihang naabot ang wala mailhing mga gikatahapan ug kalit miduol sa biktima dayong pusil, apan nakadagan kini’g balik sa main gate sa bilanggoan dihang gitiwasan sa pagpusil makadaghang higayon diha sa iyang ulo.

Sa paghulagway sa mga testigos nagpurong ang mga mamumuno apan wala nay nakatimaan sa ilang mga dagway.

Gikatahong si Feliciano nga mihapa sa yuta atol sa pagbuto-buto, gibutyag nga pabiling wala moatubang sa mga imbestigador atol ning pagsulat sa balita paghatag og pamahayag.

Si Supt. Efren Nemeño ang jail warden sa Cebu City Jail nagkanayon nga wala na sila’y tulubagon sa usa ka i-release nga mga priso, si Polistico nakapiyansa og P40 mil kagahapon sa kasong robbery subay sa kamandoan ni Judge Geraldine Faith Econg sa Regional Trial Court (RTC) Branch 9 nga gipetsahan og Agosto 13 ning buwana.

Matud pa ni Nemeño, usa ka jailguard nga si JO1 Jenefre Vilado sakop sa BJMP sa Consolacion nga diha sa lugar ang miangkong nakapabuto kaduha ka higayon sa mga nangikyas nga mga gikatahapan, apan wala kini masayod kung duna bay naigo sa upat, apan ilaha pa kining kumpirmahon sanglit wala pa nila kini makahinabi.

Dugang pa niini nga ilang susihon ang mga pagduda nga dunay mga piniriso nga nakahupot og cellphone o kaha mga tawong dunay contact sa mga mamumuno diha sa sulod.

Samtang si Nemeño nagkanayon nga wala usab makuha sa ilang close-circuit TV ang hitabo sanglit naguba na ang maong ekipo usa ka bulan na ang nakalabay ug nasayod na niini ang ilang rehiyonal nga buhatan.

Sa laing bahin, si Sr. Supt. Patrocinio Comendador, director sa Cebu City Police Office mibutyag nga dunay himuong imbestigasyon sa maong kaso ug mimando sa Homicide Section nga palawman pa ang pagsusi niini.

Gisalikway usab ni Comendador ang pagdudang milihok na usab ang gikahadlukang “vigilante” dinhi sa Sugbu ug mipadayag nga sukad pa niadtong 2008 daghan nang krimeng nanghitabo nga binuhatan sa mag-motorsiklo sa tibuok Metro Cebu.

Usa usab sa gisusi sa imbestigasyon ang posibilidad nga giunay ra sa mga kauban ang biktima tungod kay dako kaayo kining robbery group ug daghang nasilo sa ilang pagkasikop. – BANAT NEWS