Mag-uuma gipatay atubangan brgy hall

CEBU, Philippines - Gipusil ug napatay ang usa ka mag-uuma atubangan sa barangay hall samtang naglakaw paingon sa merkado aron sa pagpangompra sa bukirang bahin sa barangay Malalay lungsod sa Ronda niadtong Miyerkules sa alas 3:30 sa hapon.

Ang biktima mao si Resurection Camiros, 50, usa ka mag-uuma nga nagpuyo sa nahisgutang lugar apan lumad nga taga barangay Mabasa sa lungsod sa Argao samtang ang suspek wala pa mailhi sa kapulisan sa paghimo ning balita.

Matud pa ni PO1 Josephus Faunillan sa Ronda Police dihang nahinabi sa Banat News, ang biktima paingon sa merkado aron sa pagpangompra alang sa ilang panihapon.

Subay sa inisyal nga imbestigasyon gitabangan og pusil sa gibana-banang duha ka mga tawo ang biktima pag-abot gyud niini tungod sa barangay hall ug human sa maong pagpamusil daling nakasibat pahilayo sa lugar.

Sa pag-responde sa kapulisan napalgan niini nga nagbuy-od na ang biktima nga patay na nga dunay samad pinusilan sa iyang ulo, dughan ug sampot nga maoy hinungdan sa hinanali niining kamatayon.

Ang municipal health officer sa lungsod nga si Dr. Nicolas Nicdao maoy ni-proklamar nga patay na ang biktima.

Ang kapulisan naka-recover og duha ka kabhang sa bala sa kalibre .45 ug laing usa ka kabhang sa bala sa .9mm pistol. -  BANAT NEWS