CEBU, Philippines - Bisan paman sa imbestigasyong giatubang tungod sa pagkaeskapo sa binilanggo, usa ka polis sa Carmen police station ang hatagan sa Cebu Provincial Police Office (CPPO) og Medalya nang Kasanayan tungod sa malampusong pagkasikop sa tulo ka gidudahang mga banggiitang tulisan sa milabay’ng bulan.
Kini maoy gipahibalo ni Sr. Supt. Jesus Gaquing, director sa CPPO kinsa una nang mipaoktaba niadtong milabay’ng bulan sa maong awards dihang naka-eskapo ang lima ka mga piniriso lakip na ang tulo ka nadakpang tulisan.
Nadakpan na hinuon pagbalik ang lima ka mga pugante human sa pipila ka adlaw’ng pinangitaay hinungdan nga ihinayon na ang awarding ceremony sa polis sa Carmen.
Lakip sa hatagan og pasidungog mao ang jailer nga si PO1 Celito Suerte kinsa gipalagpot na ngadto sa lungsud sa Tudela Isla sa Camotes ug ang ilang hepe nga si Sr. Insp. Carlos Reyes ug mga sakop.
Dugang pa niini nga bisan paman sa kapalpakan ni PO1 Suerte nga na eskapohan sa lima ka mga piniriso apan instrumental usab kini atol sa pagkadakop sa mga tulisan niadtong milabay’ng bulan.
Hinuon ang kasong administratiba ug kriminal batok na kang PO1 Suerte ug mga kaubanan magpadayon bisan paman kun mahatagan sila sa maong pasidungog. - Guam Logroño (BANAT NEWS)