Misulay og patay sa konsehal gikiha

CEBU, Philippines - Gipasakaan og kasong attempted murder ang usa ka suspetsado nga buot untang mopusil patay sa usa ka konsehal sa lungsod sa Cordova.

Si Konsehal Victor Tago III   sa lungsod sa Cordova pormal nga mipasaka og kaso ngadto sa Provincial Prosecutor’s Office batok sa suspetado nga buot untang mopatay kaniya atol sa pista sa lungsod niadtong adlaw'ng Sabado nga nailhan niya kining si Domingo Baracus, ug lumad nga taga Culambugan, Lanao Del Norte.

 Matud pa ni   Tago nga si Baracus mition kaniya og armas niadtong Sabado sa gabii   samtang siya nag-supervise sa kalihukan sa pista.

Maayo na lamang nga mikagar ug wala mibuto ang maong armas hinungdan nga nakahigayon siya uban ang abag sa iyang suod nga higala nga si Jeser Pogoy sa pag-ilog sa armas gikan ni Baracus.

 Si Tago mitug-an usab nga si Baracus adunay mga kauban nga giila usab sa nadakpan nga mao sila si John Amores Jr., Nelson Manigos alyas Edgar ug usa ka Welson giingon nga pulos usab taga Culambugan, Lanao del Norte.

 Matud pa ni Tago nga ang mga kauban ni Baracus mag-atubang usab og susamang kaso apan hatagan pa kini og igong panahon nga makasumiter sa ilang counter affadavit sa dili pa masang-at sa korte ang maong kaso. – BANAT NEWS