CEBU, Philippines - Mga opisyal sa Department of Environment and Natural Resources (DENR) ug ingon man Register of Deeds ipatawag sa Ombudsaman kalabot sa nagpadayong imbestigasyon sa kontrobersiyal nga pagpalit sa Kapitolyo sa 25 ka hektaryang lote sa Balili property sa barangay Tinaan, lungsod sa Naga.
Kini kabahin sa gimando ni Deputy Ombudsman for the Visayas, Pelagio Apostol ngadto sa mga graft investigator nganong natitulohan ang maong luna nga hapit tanang lote nalubog man sa tubig sa dagat.
Si Apostol nagkanayon nga ang imbestigasyon sa iyang buhatan wala lamang magsentro sa giingong iregularidad sa pagpalit sa maong lote sa kantidad nga P98 milyones tungod sa pagduda nga overpriced ang pagpalit human usab masayri nga segun sa survey ni Geodetic Engr. Fortunato Lazaro lima ka hektarya lamang ang dryland samtang ang 20 ka ektarya nalubog sa tubig dagat.
Matud pa ni Apostol nga buot niyang sutaon nganong wala matuman ang balaod nga nagkatumbok nga ang submerged land isipon nga public domain nga nagpasabot ang maong luna gipanag-iya na sa kagamhanan ug dili na mahimong angkunon ni bisan kinsang pribadong indibidwal.
Si Apostol mitumbok nga manubag gyud ang mga opisyal sa DENR o kaha ang Register of Deeds kun mamatud-an nga may kasaypanan kining nahimo.
Matud pa ni Apostol nga kun ang lote kabahin na sa dagat dili na mahimo nga ibaligya ilabi na ngadto sa usa ka local government unit sama sa kagamahan sa lalawigan sa Sugbo kay nahimo na kining propriedad sa gobiyerno.
Sa sayo pa, si Bokal Victor Maambong miangkon sa interview sa DyRF Radyo Fuerza nga ang usa sa iyang staff gisultihan sa usa sa opisyales sa DENR nga nasayop ang ilang buhatan sa paghatag og titulo sa maong lote nga gipanag-iya sa pamilyang Balili ug gipalit sa Kapitolyo tungod kay halos tanan sa maong luna naabot na man sa tubig dagat.
Apan sa habig sa kapitolyo, si Atty. Rory Jon Sepulveda, ang tigpamaba ni Gobernador Gwendolyn Garcia mipasabot nga mahimong matitulohan ang usa ka luna ilabi na kun gikonberter ug gigamit kini isip fish pond.
Si Apostol mitumbok hinuon nga ang maong sitwasyon wala lamang nahitabo dinhi sa probinsiya sa Sugbo kun dili nahitabo usab kini didto sa Luzon diin nasayop ang paghatag og titulo sa naasoy nga ahensiya sa kagamhanan. – BANAT NEWS