CEBU, Philippines - Ang mga asawa ug anak sa mga sundalong namatay ingon man nanga-agol sa pagpakiggubat sa mga terorista ug rebelding kumunista gihatagan sa Central Command og pasidungog ug special financial assistance ug scholarship certificate kagahapon sa buntag.
Si MGen. Arturo Carillo sa AFP (RET) Presidential Adviser on Military Affairs maoy nangulo sa paghatag sa maong pasidungog ingon man hinabang inabagan ni Lt. Gen. Isagani Cachuela, ang pangulo sa Centcom.
Siyam ka biyuda kansang mga bana nga sundalo namatay sa gubat nakadawat og tag P250 mil nga cash assistance, samtang 16 usab ka mga asawa og sundalo nga nangaangol, nakadawat usab og tag P50 mil gikan sa President’s Social Fund.
Si MGen. Carillo nga gikahinabi sa mga tigbalita nagkanayon ang maong pagpanghatag og pasidungog ug hinabang maoy pagtuman sa kamandoan ni Presidente Gloria Macapagal Arroyo.
Matud pa ni MGen. Carillo nga gusto gyud sa Pamuno nasud nga ikahatag dayon ang mga benespisyo ngadto sa mga minahal sa kinabuhi sa mga sundalo nga namatay ug naangol sa ilang pakig-asdang sa mga kaaway ilabi na sa mga terorista. - Guam P. Logrono (BANAT NEWS)