Maambong di motuo Balili nangilad

CEBU, Philippines - Nagdumili pagtuo si Provincial Board member Victor Maambong nga giilad sa pamilyang Balili ang Kapitolyo pinaagi sa pagbaligya niini sa ilang 25 ektaryas nga yuta sa kantidad nga P 98 milyones, apan giingong hapit katunga niini honasan. 

Gumikan niining makabungog ug makapauwaw nga isyu nga nagbutang karon sa mga opisyal sa lalawigan sa dakong peligro nga mapriso, gipasidan-an ni Maambong ang pamilyang Balili nga motug-an sa tinuod.

Matud pa ni Maambong nga mas maayo nga mintras sayo pa ibutyag nalang sa maong pamilya ang tinuod aron nga dili mahusgahan sa mga tawo nga nangilad sila ngadto sa mga opisyales sa lalawigan sa Sugbu. Kini tungod kay sa madugay ug sa madali, masuta ra man sa gihapon ang tanan sa higayong matandi na ang survey ni Geodetic Engr. Fortunato Lazaro ug sa survey sa Kapitolyo.

Hinuon gitataw ni Maambong nga sa higayon nga mapamatud-an nga may kakulian ang titolo sa yuta , paninglon pagbalik sa kagamhanan sa lalawigan sa Sugbu ang pamilya ug bawion niini ang P98 milyones nga gibayad ngadto sa maong pamilya. Dugang pa ni Maambong nga gawas nga mabawian og kwarta ang maong pamilya, mahimo pang mapasakaan sila og kaso sa kagamhanan sa probinsiya sa Sugbu. - Chester Abadilla (BANAT NEWS)