Sundawo di paapilon sa politika

CEBU, Philippines - Ang hepe sa Central Command(CENTCOM) Lt. Gen. Isagani Cachuela, mi-awhag sa iyang mga sakop nga dili magpadala sa haylo sa ubang mga sector nga nagtinguha sa pagpalagpot kang Presidente Gloria Macapagal Arroyo.

Gihimo ni Cachuela kining maong awhag human niya hisayri nga ang mga kaatbang sa politika ni Presidente Arroyo nagpanikad na aron palagputon siya sa puwesto.

Gipasabot ni Cachuela nga silang anaa sa Centcom magpabilin sa ilang loyalidad sa pagsuporta sa kasamtangang administrasyon subay sa gitawag nga chain of command ug dili sila madani sa unsa mang mga haylo.

Miingon si Cachuela nga kining mga gihimo sa mga kaatbang sa administrasyon maoy gitawag nga military adventurism apan isip may baruganan sa ilang pagkatawo ug pagtuman sa balaod, dili sila makaako nga putlon ang termino sa presidente ilabi na nga matapos na karong Hunyo sa sunod tuig ang iyang termino.

Matud pa sa hepe sa Centcom nga aduna sila’y mandato nga maoy gihatagan nila og dakong pagtagad sama sa pagpatuman sa ilang kampanya batok sa insurhensiya dinhi sa Central Visayas.

Gumikan sa maong mandato gidid-an sila sa pag-apil-apil sa mga kalihokan nga may labot sa pamolitika ilabi na kun kana mugnaon sa mga tang-an na nga politiko, matud pa ni Cachuela. Gitin-aw niya pag-ayo ang iyang kamandoan ngadto sa ilang mga sakop nga sundawo nga likayan gyud ang pagpakiglambigit ngadto sa ubang sector kansang tumong mao lamang ang paggamit sa military nga hinagiban nila sa pagpatunhay sa ilang mga binuang.

Matud pa ni Cachuela nga usa ka dakong supak sa batakang balaod ang pag-apil-apil sa mga sundawo sa pamolitika ug nagtangag kini og bug-at nga silot .

Midugang siya nga gawas nga supak kini sa Konstitusyon, usa usab kini ka kalapasan batok sa  article of war hinungdan nga kadtong naghuna-huna niini angayang mangandan sa ilang kaugalingon.

Gipasalig niya sa publiko nga silang mga sundawo andam nga moabag sa kapulisan sa pagpatunhay sa kahapsay ug kalinaw dinhi sa Central Visayas. – BANAT NEWS