Patay ang anak sa kapitan sa barangay human madisgrasya ang sakyanan niining nawad-an og preno samtang paingon untang maghatud og mga isda sa sitio Pio Veloso barangay Mahawak lungsod sa Medillen kagahapon sa alas 3:30 sa kaadlawon.
Ang biktima nga patay nang nahidangat sa tambalanan mao si Junivic Orbeso Carasina, 28, molupyo sa maong lugar ug anak ni kapitan Vicente Carasina sa maong barangay.
Matud pa ni SPO2 Rolland Reyes sa Medillen Police dihang nahinabi sa Banat News, nagsakay atubangan sa trak de karga niini nga gimaneho sa usa ka Arnold Solon, 33, si Carasina aron maghatud sa 48 ka kahon nga isda dinhi sa siyudad sa Sugbo. Apan subay sa inisyal nga imbestigasyon pag-abot sa dulhogon nga bahin sa maong lugar nawad-an og preno ang trak hinungdan nga nipidpid sila sa daplin apan nabangil ang ligid sa trak maong kini nalimbuwad.
Ang biktima natagak ug nadat-ugan ang dughan sa atop sa trak de kargang nalimbuwad samtang ang drayber nga nalabay igo lang nakaangkon og mga pangos ug bun-og.
Daling gidala ang duha sa Verallo District Hospital sa Bogo apan gideklarar nga dead on arrival si Carasina. (Darrel Carumba)