CEBU, Philippines - Patay ang usa ka sikad-sikad drayber human pusila sa iyang kompetensiyang laing sikad-sikad drayber human sa ilang sinukmagay sa Poblacion lungsod sa Sibonga niadtong Lunes sa alas 11:30 sa gabii.
Ang biktimang patay nang nahidangat sa tambalanan mao si Herbert Joselito Altubar, 61, molupyo sa nahisgutang lugar samtang ang suspek giilang si Fernando Bringcola, 37, nagpuyo gihapon sa maong dapit.
Matud pa ni SPO2 Marlon Cortes sa Sibonga Police dihang nahinabi sa Banat News ang biktima ug ang suspek nagkalalis sa wala pa ang hitabo nga niresulta sa ilang pag-initay ug pagsinukmagay.
Ang biktima midangop sa police station aron sa pagpa-blotter dayon milakaw paingon sa Deiparine Medical Clinic aron sa pagpatambal sa mga bun-og ug pangos nga iyang na-angkon.
Samtang kini nagpadulong sa maong tambalanan giatangan sa suspek ang biktima ug gipusil makadaghang higayon ug naigo tungatunga sa iyang dughan ug tuong bitiis.
Ang biktima gidali unta pagdala sa Deiparine Medical Clinic sa maong lungsod apan gideklarar nga dead on arrival, samtang ang suspek nadakpan usab dayun diha sa iyang pinuy-anan sa kapulisan. (Darrel Carumba) (BANAT NEWS)