Cañete mohatag og scholarship grant

CEBU, Philippines - Si Dr. Paulus Marie Cañete, Presidente sa Mandaue City College (MCC) sa Jagobiao campus naglaraw nga dili na pabayron sa eskuylahan ang tanang estudyante sa MCC sa ikaduhang semester niining tuiga.

 Gipahibawo na niya ang tanang molupyo sa dakbayan sa Mandaue ilabi na ang mga ginikanan kalabot niini ug naglumpayat sa kalipay ang tanan.

Alang sa taga Mandaue murag hatag sa Ginoo kanila si Cañete kay walay maayong lake karong panahona nga manghatag og libre nga pagtuon ngadto sa linibo ka mga estudyante gawas lamang kaniya ni Canete.

Gitawag kini Cañete nga   “One Year Scholarship Program” (OYSP) nga ilang sugdan sa pagpatuman sa ikaduhang semester niining tuiga.

Si Cañete mibutyag sa Banat News nga ang mga tinun-an nga makapahimulos sa maong programa suwerte kaayo.

“Nasayod ko nga nagdako lang ang tinguha nga makapadayon unta sila sa ilang pagtungha, pero, ang nakapugong lang kay walay kuwarta ang ilang ginikanan.”

“Unya, kun ato kining pasagdan kuyaw na hinuon nga mahimo kining problema sa atong katilingban kay masulod na man hinuon ni sa bisyo uban sa ilang mga barkada, busa mas maayo pang paeskuylahon total wala man sila’y bayad aron sila makabaton og maayong kaugmaon,” matud pa ni Cañete.     

Si Dr. Elmer Repalda, usa ka professor sa maong tulunghaan mibutyag usab sa Banat News nga ang OYSP   ilang gitanyag ngadto sa mga estudyante nga mokuha og upat ka tuig nga kurso.

Naglakip na sa mga kurso nga gitanyag nga libre sa maong tulunghaan mao ang nursing, education, criminology, computer ug uban pa. (Romeo T. Limpangog)    (BANAT NEWS)