CEBU, Philippines - Usa ka patay’ng lawas sa usa ka babaye ang nakit-an sa mga mananagat nga naglutaw sa dagat ug wala nay kinabuhi sa barangay Sto. Niño sa lungsod sa Malabuyoc niadtong Lunes sa alas 4:00 sa hapon.
Sa paghimo ning balita wala pa mailhi ang maong babaye nga gibana-banang 40 ngadto sa 43 anyos, may pagka-tambukon, pution ang pamanit ug nagsul-ob og stripe nga shorts kolor pink ingon man striped nga sinina nga dunay kombinasyon nga kolor nga yellow ug itom.
Matud pa ni PO2 Santiago Antikristo sa Malabuyoc Police dihang nahinabi sa Banat News nakit-an ang maong babaye nga nagkulob ug naglutaw sa dagat hinungdan nga ilaha dayun kining gidala sa baybayon ug gipahibawo ang kapulisan.
Ang municipal health officer nga si Dr. Aloba Roniquisa maoy nikompirmar nga patay na ang biktima ug subay sa gihimong pakisusi gituohang pagkalumos ang gikamatyan sa babaye.
Nakahipos usab og impormasyon ang kapulisan nga dunay nakakita sa maong babaye nga nagsuroy-suroy sa honasan pipila ka gutlo sa wala pa kini makit-ing patay.
Gituohan sa kapulisan nga dili molupyo sa Malabuyoc ang maong babaye sanglit wala may bisan usa sa mga molupyo sa maong lugar nga nakaila kaniya. (Darrel Carumba) (BANAT NEWS)