CEBU, Philippines - Duha ka tawo nga naghupot og ginadiling drugas nasikop sa kapolisan didto sa sitio Tugas, barangay Gun-ob, dakbayan sa Lapulapu kagahapon sa buntag.
Ang mga suspetsado mao sila si Arnel Baguio Sotto, 40, ulitawo, ug si Edward dela Cerna Sorono, 33, minyo, nga pulos taga Tugas.
Si Sotto nasakmitan og 10 ka paketeng shabu, samtang 8 usab ka pakete ang kang Sorono.
Gituohan sa kapolisan nga ang mga suspetsado maoy tigsuplay og shabu sa mga trabahante sa Mactan Export Processing Zone Authority (MEPZA) sa dakbayan sa Lapulapu.
Matud pa ni PO2 Ritchie Aballe ang team leader sa Task Force Motorsiklo ug mga kaubanan nga si PO3 Jomar Ybañez uban sa mga sakop sa Barangay Intelligence Network (BIN), nga nag-roving sila kagahapon sa alas 5:00 sa buntag didto sa Tugas dihang nakita nila si Sotto nga kadudahan kaayo og lihok.
Sa dihang ilang gisita nasuta nila nga nagluklok kini og 10 ka paketeng shabu sa bulsa.
Nianang pagka-alas 7:30 sa buntag si Sorono na usab ang ilang nasigpatan sa maong dapit ug dihang ilang gisita didto usab sa bulsa niini ang plastik nga gisudlan sa 8 ka paketeng shabu.
Sa pagkakaron nagpahayahay na ang maong mga suspetsado sa prisohan sa kapolisan sa Lapulapu samtang giandam na ang kaso nga isang-at batok kanila. (Bong Soriano)