Nagmolestiya sa dalaga matangtang sa trabaho

CEBU, Philippines - Dako ang kahigayonan nga matangtang sa trabaho ang usa ka kawani sa City Social Welfare and Development Office (CSWDO) sa dakbayan sa Mandaue nga gireklamo sa duha ka dalagita nga molugos unta kanila, kun kapamatud-an sa korte.

Ang suspetsado nga si Apolinario Bacolod, 53, nga taga Mandaue ug kawani sa CSWDO, gibalhin na karon sa laing departamento.

Si    CSWDO officer Violita Cabada mibutyag sa DYKC kagahapon nga dili sila buot nga maduhig ang ilang buhatan sa dautang binuhatan sa suspetsado.

Ang ilang buhatan maoy dangpanan sa mga babayeng biktima sa lugos ug dinaogdaog sa katilingban, apan imbis tabangan. tiwasan na man hinuon.

Ang Mandaue City Prosecutor’s Office miduso sa kaso ni Bacolod ngadto sa korte niadtong Agosto 4 niining tuiga.

Ang kaso nga gipasaka sa duha ka dalagita mao ang kalapasan sa Special Protection of Children Against Child Abuse, Exploitation and Discrimination Act.

Matud pa sa mga biktima nga gisulayan sila sa paglugos sa suspetdo sa managlahing higayon sa miaging tuig atol nga sila lamang ang kuyog niini.

Hinuon gipanghimakak ni Bacolod ang maong pasangil. (Romeo T. Limpangog)