Wa mamuhis paduolon sa City Hall

CEBU, Philippines - Gisugyot ni Cebu City Councilor Joey Daluz ngadto sa mga proprietary school ug hospital sa siyudad nga dalion ang pagpakigsabot-sabot niini sa kagamhanan sa dakbayan kalabot sa bayranan nilang buhis.

Kini samtang gitinguha usab sa City Treasurer’s Office (CTO) ang pagpugong na sa mga propriedad niini ug sa ubang delinquent taxpayers sa siyudad.

Matud ni Daluz nga walay makapugong sa CTO paghimo sa tanang paagi nga makolekta ang buhis nga alang sa City government. Una nang misang-at og kaso ang pito ka proprietary school ug hospital nga nagkwestyon sa tax ordinance nga gibasihan sa dakbayan pagkolekta kanila og business tax.

Giinsister sa Cebu Doctors’ University, Cebu Institute of Technology, Southwestern University, Sacred Heart Hospital, Cebu Doctors’ Hospital, Cebu North General Hospital, ug Velez General Hospital nga sila exempted sa pagbayad sa maong buhis.

Apan matud ni Daluz nga wala makakuha og temporary restraining order ang maong mga tunghaan ug tambalanan gikan sa hukmanan.

Kini ang hinungdan nga walay makababag sa lakang nga himoon sa CTO tungod kay ilang trabaho ang tax collection.

Ang konsehal nga maoy chairman sa Committee on Budget and Finance sa City Council miingon nga mas maayong dalion na lang sa mga tag-iya sa eskuylahan ug hospital ang pagpakignegosasyon niini sa siyudad. “Ato lang dalion, maybe we can forge a negotiation before all these things will happen nga ang atong City Treasurer mo-levy sa ilang mga properties,” sumala ni Daluz.

Nasayran nga adunay gitakdang court-assisted mediation tali sa mga nangeklamo ug sa kagamhanan sa dakbayan alang sa maong katuyoan.

Una nang gipahibawo ni City Treasurer Ofelia Oliva nga niining semanaha, ila nang ipadala ang certificate of tax delinquency ngadto sa labing minos 50 ka dagkong business establishment sa siyudad lakip na ang pito ka dagkong eskuylahan ug hospital.

Human unya niini miingon si Oliva nga ila gilayong ipublikar ang mga delinquent taxpayer sa dili pa isubasta ang mga propriedad niini sa sunod buwan.

Matud ni Oliva nga kung mobayad lang sa ilang obligasyon ang nanag-iya sa maong mga establisimento, ang gobyerno sa dakbayan mokita og labing minos P400 milyones sa business ug real property tax niini.   (BANAT NEWS)