CEBU, Philippines - Nakaeskapo sa city jail ang usa ka binilanggo niadtong milabay’ng Domingo sa Lapulapu City Jail sa sitio Soong, barangay Mactan dakbayan sa Lapulapu.
Ang mieskapo mao si Edgardo Teaño, 37, residente sa sitio Sangi sa Pajo dakbayan sa Lapulapu nga may kasong murder sa RTC Branch 54 sa dakbayan sa Lapulapu ug nabalhog sa maong bilanggoan niadtong bulan sa Hulyo 2008.
Matud pa ni JO1 Darwin Denela sa administrative office sa Lapulapu City Jail sa milabay’ng Domingo petsa 9 ning bulana nakugang ang tanan sa dihang atol sa pag-ihap sa mga binilanggo mga alas 10:00 sa buntag wala na si Teaño.
Gisusi usab nila ang ilang security camera nga palibot sa ilang bilanggoan apan wala gyud nila makita kung asa kini miagi.
Si Jail Supt. Isabelo Cartin ang Jail Warden sa Lapulapu City Jail nagdudang mikatkat sa koral ug wala mabantayi sa duty guard ang maong mieskapo.
Si BJMP 7 Regional Director Jail Chief Supt. Doris Dorigo personal nga miduaw sa maong bilanggoan ug gipaesplikar si Supt. Cartin kalabot sa maong insidente.
Matud pa ni Dorigo lakip si Supt. Cartin ang ipaubos sa imbestigasyon ug ang mga BJMP personnel nga nagbantay niadtong higayona.
Si SJO4 Emelianito Enriquez ang public information officer sa maong bilanggoan mibutyag nga base sa iyang pakisusi, si Teaño nagpakaaron-ingnong mokawos og tubig maong nakagawas kini sa secondary gate.
Gikan didto gikatahong milahos sa interlink fence nga may barbed wires ug nakagawas. Ang jailguard nga si JO1 Jerson Asuxilio gikatahong wala diha sa iyang pwesto atol sa pag-eskapo ug karon giimbestigaran na. (Bong Soriano uban sa report ni Chester Abadilla) (BANAT NEWS)