Bolo di kombinsido sa geodetic engineer ni Tomas

CEBU, Philippines - Dili pa kombinsido si Bokal Juan Bolo, chairman sa committee on real properties sa probinsya sa Sugbu sa pangangkon sa geodetic engineer sa Balili property nga 80 porsiyento sa gipalit nga luna sa Kapitolyo katubigan.

Si Engr. Fortuna Lazaro mipatim-aw sa buhatan ni Mayor Tomas Osmeña niadtong miaging adlaw ug nipakita sa kopya sa Cadastral Survey nga nagpakitang 80 porsiyento sa 25 ka ektaryang Balili property nga gipalit sa kagamhanan sa probinsya og 98 milyones katubigan.

Apan matud pa ni Bolo nga dili siya makatuo dayun niini tungod kay pagsusi nila sa maong lugar daghan ang kalubihan ug mga punoan sa mangga nga nahimutang sa maong luna.

Hinuon nagkanayon ang bokal nga paabuton lang nila ang resulta human nimando na si Gobernador Gwendolyn Garcia pag-verify sa estado sa maong luna sa Balili property.

Niinsister ang bokal sa giluwatang pamahayag sa mayor nga criminal neglect ang ilang gihimo ug matud niya nga dili matawag og criminal neglect kay titled ang maong property sa Balili.

“Dili na criminal neglect kay titled mana ang property…gani ang appraisal committee nga nag-report niana wala sad ka determine,” matud pang Bolo dihang na-interview sa DyDD kagahapon.

Nipasabot siya nga mahimong ma-retain ang maong contract sa higayon nga mamatud-an ang estado niini sa maong luna. Apan sa tan-aw ni Bolo layo ra kaayo sa tinuod ang giingong 80 porsiyento sa maong luna naglutaw sa tubig.

Si Atty. Rory Sepulveda ang tigpamaba sa Kapitolyo mibutyag nga buot pakigkitaan karon sa gobernador si Engr. Lazaro tungod kay nagtuo silang dako og matabang sa sa Provincial Environment and Natural Resources survey ang survey report niini. Matud pang Sepulveda mapasalamaton sila kang Mayor Osmeña tungod sa pagtabang niini pagpasusi sa maong lote. (Rey Pasaporte uban sa report ni Chester Abadilla)   (BANAT NEWS)