Gi-recruit sa gang sa Talisay 7 ka minors gipasoan, gikulata

CEBU, Philippines - Nagpanon kagahapon sa buntag uban sa ilang mga ginikanan ang pito ka menor de edad duha kanila mga babaye diha sa Talisay City Police Station Women and Children’s Protection Desk aron moduso og reklamo batok sa lalaking mi-recruit kanila nga mosulod og gang kinsa mikulata kanila ug mipaso sa ilang mga kamot.

Ang mga biktima nagpanuigon gikan sa 12 ngadto sa 15-anyos ug mga estudyante sa high school diha sa Talisay City National High School ug sa Lagtang Night High School.

Usa sa mga ginikanan nga nahinabi sa Banat News kagahapon mao si Dodo Abaceal taga sitio Kwadra, barangay Lagtang, dakbayan sa Talisay nagkanayon nga nabantayan nila ang ilang mga anak nga dunay mga paso sa sigarilyo sa tuong kamot dapit sa mga punoan sa tudlo.

Usa ka Frederick Adlawan gibana-banang 30-anyos na ang panuigon niini ug giingong sakop sa True Brown Style (TBS) 13 maoy mi-recruit kanila, gikatahong 15 ka mga bata ang na-recruit sa grupo sa Lagtang.

Matud ni Abaceal nga gipangayoan pa og tag P5 matag usa isip kontribusyon ang mga bata apan dihang nabisto na si Adlawan misibat na kini, nianang milabay’ng gabii gibato ang panimalay sa mga biktima ug gituohang binuhatan kini ni Adlawan nga nasukong gisumbong. Gawas sa mga paso duna pay mga bun-og sa lawas ug nawong ang mga bata, sumala pa sa usa sa mga bata nakuha nila kini pinaagi sa “massacre” sulod sa 30 segundo.

Samtang ang mga babaye gibali-bali og sagpa kinse ka higayon sa maong suspek. Si SPO1 Margienette Yosores sa Women and Children Protection Desk nagkanayon nga ang suspetsado ang pasakaan og kasong child abuse, corrupting minors ug kalapasan sa anti-hazing law.  (BANAT NEWS)