Balili beach hunasan gyud

CEBU, Philippines - Hasta si Mayor Tomas misakay na sa kontrobersyal nga pagkapalit sa Kapitolyo sa luna sa Balili resort sa lungsod sa Naga ug ning tungura gibutyag sa mayor nga hunasan gyud ang napalit nga luna base sa misusi sa maong dapit.

Usa ka geodetic engineer nga si Engineer Fortunato Lazaro mipatim-aw sa buhatan sa mayor ug mibutyag nga iya nang na-survey ang Balili property upat ka tuig na ang nakalabay dihang usa ka kompanya ang mipadayag nga mopalit unta niini.

Gipadayag ni Lazaro nga sa iyang survey, lima ka ektarya lang sa nahisgutang propriyedad ang uga kun di maabot sa tubig, 13 ka ektarya ang fishpond, ug ang 7 ka ektarya anaa ilawom sa tubig.

Ang 25 ka ektaryang luna sa Balili property gikatahong gibayran na sa kagamhanan sa lalawigan og dul-an sa usa ka gatos ka milyon ka pesos.

Butang nga gihingangha ni Osmeña human usab masayod nga ang labing dako nga portion sa maong luna anaa ilawom sa tubig.

Nagkanayon si engineer Lazaro nga siya andam motestigo sa bisan unsang imbestigasyon nga ipahigayon base usab sa iyang findings. “Yes, as far as this finding is concerned unless they have done some works but I believe until now there was no intervention by somebody else it’s still the same,” sumala ni Lazaro.

Sa nakita ni Osmeña gikan sa findings sa survey sa geodetic engineer, moabot sa 80 porsiyento sa Balili property ang anaa ilawom sa tubig.

Alang sa mayor, kwestyonable ang pagpalit sa Kapitolyo sa nahisgutang luna nga wala na manginahanglan og congressional inquiry.

“One would think that it’s only 5% of the property is underwater, maybe that’s some silly mistake but when 80% of the property is underwater, that’s criminal neglect,” matud pa ni Osmeña.

Gipadayag sa mayor nga andam niyang ihatag ang findings sa geodetic engineer kung mopahigayon og pakisusi sa maong kontrobersiya ang Ombudsman Visayas.

Una nang gipakita ni Capitol consultant Rory Jon Sepulveda ang mga titulo sa napalit nga luna sa Kapitolyo apan wala hinuon matino kung kini pulos ba dry land.

Apan si Atty. Roy Salubre ang provincial treasurer sa lalawigan mibutyag nga posibleng makiha si Osmeña kun kini iyahang gihimo nga napanag-iya na sa lalawigan ang maong luna.

Si Salubre mipadayag nga dunay himuong kaugalingong geodetic survey ang lalawigan pinaagi sa Provincial Environment and Natural Resources nga geodetic engineer nga si Roy Cabuenas. (BANAT NEWS)