CEBU, Philippines - Naangol ang tulo ka tawo dihang gipamusil kini sa ilang kontra didto sa eskina sa mga dalan F. Ralota ug Mabini sa barangay Poblacion, dakbayan sa Danao sa miaging gabii. Ang mga biktima mao sila si Jay Michael Castro Francisco, 19, Rey Dagatan 17, ug Dave Marco Garbo, nga pulos nagpuyo sa sitio Catadman sa barangay Sabang sa nahisgotang dakbayan.
Samtang ang suspetsado nailhan usab nga si Jonathan Tapayan, hingkod, nga taga Tuburan Sur sa nahisgotang dakbayan.
Si Teofilo Deguilmo sa kapolisan sa maong dakbayan mibutyag sa Banat News nga nakig-inom ang mga biktima uban sa ilang mga higala atol sa gipahigayong disco sa maong dapit.
Apan kalit lang mitumaw ang suspetsado ug gipanirohan dayon sila sa armas de fuego niini hinungdan nga mialibwag ang mga tawo diha sa palibot sa diskohan sa kabalaka nga mapagan sila ug masabak sa saag nga bala.
Pagkahawan sa lugar nahibilin ang tulo nga pulos nagkadugo na sa mga samad sa bala nga mitaroy sa ilang kalawasan.
Gipanghatod dayon ang maong mga biktima ngadto sa Vicente Sotto Memorial Medical Center sa dakbayan sa Sugbo, samtang misibat usab dayon ang suspetsado nga maoy gipangita karon sa kapolisan sa maong dakbayan.
Matud pa ni Deguilmo nga personal nga dumot ang hinungdan sa maong pagpamusil. – BANAT NEWS