VP de Castro nanghatag og tseke sa Jagobiao

CEBU, Philippines - Gihinangop sa mga lumolupyo sa barangay Jagobiao sa dakbayan sa Mandaue ang gihimong pagbisita ni Bise Presidente Noli de Castro niadtong miaging Sabado human usab sa pag-apud-apod sa mga tseke gikan sa Community Mortgage Program ug mga titulo sa luna nga ilang gipuy-an nga maoy naghingpit sa ilang pagpanag-iya.

Ang mga lumolupyo nga sakop sa upat ka mga homeowner associations maoy mga beneficiary sa programa sa kagamhanan nga gipangindahay sa mga lumolupyo sulod sa dugay na nga panahon.

Si De Castro mitunol sa 35 ka mga titulo ngadto sa mga benepisaryo nga naghingpit na sa ilang pagpanag-iya sa gipuy-an nilang luna.

Gipahibalo usab ni De Castro ang Proclamation 1772 ni Pangulong Gloria Macapagal Arroyo nga naghatag og pagtugot nga ang kabahin sa luna sa Eversely Child Sanitarium sa barangay Jagobiao ang hingpit na nga mapaubos sa socialized housing development program sa kagamhanan niadto pang Mayo 14, 2008.

Si Engr. Randy Libron nga maoy pangulo sa Socialized Housing Finance Corporation dinhi sa rehiyon sa iyang pamahayag miingon nga naglakip sa mga nakadawat og tseke mao ang Cabancalan Homeowner Association ug Christ the King Home Owners Association sa maong dakbayan.

Sa nasayran nga ang mga nakadawat sa Certificate of Entitlement of Lot Allocation (CELA) mao kadtong mga nagpuyo sa luna nga gipanag-iya sa nasudnong kagamhanan nga nakasugod na og bayad niini. – BANAT NEWS