Panimalos ang motibo's pamusil

CEBU, Philippines - Mitumaw nga panimalos ang motibo sa pagpusil ug pagpanigbas sa duha ka mga lalaking nanguryente og isda kapin usa ka semana na ang nakalabay sa sitio Libo, barangay Mohon sa dakbayan sa Talisay, sumala pa sa kapolisan.

Si Supt. Henry Biñas, hepe sa Talisay City Police Station sa pakighinabi sa mga tigbalita nagkanayon nailhan na nila ang mga gikatahapan apan di pa nila ikabutyag ang mga pangalan.

Mitug-an hinuon siyang mapasaka na nila ang kasong double murder pipila ka adlaw gikan karon batok sa mga suspetsado diha sa piskaliya sa siyudad.

Kahinumduman nga gipamusil ug gitigbas sila si Welcres Camingawan ug Victor Labarejos ug nangamatay ug naangol ang kauban nilang si Jeffrey Caprino dihang kalit giduol sa tulo ka mga lalaki ug gibadlong tungod sa ilang pagpanguryente dayon gipaulanan og bala ug gipanigbas.

Laing tulo pa ka kauban sa mga biktima nga sila si Dandi Magdadaro, Jackie Alcover ug Long-long Nacario ang nakadagan.

Si Biñas nagkanayon nga base sa ilang imbestigasyon nanimalos ang usa sa mga suspetsado drayber sa habal-habal ug giingong gikulata sa usa sa mga biktima dihang gikan kining naghatod og pasahero diha sa sitio Crasher sa barangay Lawaan III diin mamuyo ang mga biktima.

Sumala pang Biñas ang mga suspek nagbuwag-buwag na karon og tago, dunay tua sa Poro, Camotes ug duna say tua sa habagatang bahin sa Sugbu magtago apan pulos na nasundan sa kapolisan.

Ang hepe midugang nga posibleng ang ubang mga nagtabon sa ilang mga nawong mga trabahador sa irrigation nga gitukod diha sa lugar tungod kay kasagaran sa mga trabahador ang magtabon sa ilang nawong proteksiyon sa kainit.

Apan kasagaran sa nagtrabaho diha sa irrigation mga paryente sa mga suspetsado ug posibleng dunay laing usa o duha ang nagsilbing look-out sa insidente. – BANAT NEWS