CEBU, Philippines - Natusak-tusak sa mga bala ang lukop lawas sa usa ka hepe sa tanod human gi-ambush sa gibana-banang tulo ka suspetsado samtang naglakaw nga padulong mopauli sa ilang panimalay niadtong Sabado sa alas 7:00 sa gabii sa Trans-Central Highway barangay Gaas, lungsod sa Balamban.
Ang namatay giila sa kapulisan nga si Felix Sabalande, hepe sa mga tanod sa barangay Duangan sa nahisgutang lungsod kinsa naabtan nalang nga patay sa mga residente sa Gaas.
Ang kapolisan wala pa makatumbok kun si kinsa ang mipatay sa biktima sanglit mga buto lang sa armas ang nadungog sa mga tawo sa maong dapit.
Si PO2 Cesar Climaco, sa Balamban Police Station nga gikahinabi sa Banat News nagkanayon nga base sa nakuhang mga basiyo sa mga balang gituuhang gigamit sa mga mamumuno armas nga carbine, kalibre .45 ug 9mm ang gigamit sa krimen.
Matud pa ni PO2 Climaco nga ang biktimang si Sabalande mga alas 3:00 pasado sa hapon gisugo kini sa barangay kapitan sa Duangan nga si Kapitan Arito Batomalaki pagpahatod sa mga suwat sa mga mag-uuma sa ilang lugar alang na sa ilang tigom karong buntaga.
Sumala pa niini nga sa wala pa mopauli si Sabalande , gi-imbitar kini'g panihapon sa panimalay ni Konsehal Vicente Gallo sa barangay Gaas kinsa amigo usab niini, apan sa paghuman niini'g panihapon nidiretso kini sa pagpauli.
Pila-pila ka metros gikan sa panimalay ni Konsehal Gallo nadungog ang sunod-sunod nga sipang buto-buto sa armas hinungdan nga daling gisusi ang lugar uban sa mga silingan ug mao nalay nisugat sa ilang mga mata nga nagbuy-od na daplin sa dalan ang biktima.
Nagtuo ang kapulisan nga tulo ka mga tawo ang responsable sa pagpang-ambush sa biktima base sa tulo ka klase sa bala nga nakit-an.
Wala pa hinuon maestablisar sa kapulisan sa Balamban kun unsay motibo sa pagbanhig sa biktima.
Samtang usa usab ka panday ang nabulit sa bala ug namatay human gipusil sa wala mailhing tawo samtang mipauli sa ilang panimalay kagahapon sa 1:40 sa kaadlawon sa sitio Riverside barangay Arpili, lungsod sa Balamban.
Ang gipatay giila sa kapulisan nga si Edgardo Madraga, 52, nagpuyo sa nahisgutang lugar ug nakaangkon og samad pinusilan gikan sa usa ka .45 kalibre.
Ang kapulisan wala pa makatumbok kun unsay motibo sa pagpusil-patay sa biktima kinsa nakit-an nalang patay daplin sa dalan human sa mga buto-buto sa armas.
Ang kapulisan nakahipos og lima ka mga kabhang sa kalibre .45 sa crime scene. – BANAT NEWS