Erap gidugok sa taga South Dist.

CEBU, Philippines - Bisan wala pay “go signal” nga mamahimo nang makapangampanya ang mga nangambisyong mamahimong pangulo o opisyal sa Senado naghinay-hinay na og bisita sa nagkadaiyang parte sa Sugbu ang mga gidungog nga magpapili sa 2010.

Kagahapon, ang grupo sa gipalagpot nga pamuno sa nasud nga si Joseph Estrada uban nila ni Makati Mayor Jejomar Binay, Rep. Ferdinand “Bongbong” Marcos, Juan Ponce Enrile; Ernesto Maceda mibisita sa mga dapit nga diin mas baga ang “masa” kon mga kabus.

Ang grupo gikuyogan sa usa sa mga haligi sa oposisyon dinhi sa dakbayan sa Sugbu nga mao ang negosyanteng si Jonathan “Atan” Guardo nga duna say bagang supporters diha sa South District.

Ang pagbisita dinhi gitawag nilang “Lakbay Pasasalamat” nga ang girombo mao ang katorse ka mga barangay sa South District sa dakbayan sa Sugbu nga sagad naa magpuyo ang bagang duot sa mga masa.

Mao na kini ang ikaduhang higayon niining tuiga nga mihimo og “Lakbay Pasasalamat” si Estrada dinhi sa Sugbu, ang labing unang higayon natigayon diha sa mga kalungsoran sa lalawigan.

Lakip sa ilang gibisita mao ang Banawa, Guadalupe; Labangon; Tisa; Punta Princesa; Kinasang-an; Pardo; Inayawan; Basak-San Nicolas; Mambaling; Duljo; Sawang-Calero; Suba ug gitapos sa gymnasium sa barangay Pasil.

Pipila sa maong mga barangay mga naila na kaniadto pa nga mga balwarte sa oposisyon dinhi sa Sugbu nga maoy gisaligan sa oposisyon pagbuntog sa mas nakapabor nga naa sa kasamtangang administrasyon.

Gani, atol sa motorkada ug sa mismong mga mini-rallies nga gihimo dunay mga tawong misiyagit pa og “Guardo! Diha mi nimo!” samtang ang uban misinggit og pagsuporta pinaagi sa pagsinggit og “Erap! Erap! Erap!” Base sa nakita diha sa mga nanambong kagahapon, daw wala matandog ang suporta sa maong mga tawo kang Estrada bisan paman sa mga kontrobersyang pasangil nga pagpangurakot, pagkasugarol ug pagpangawkaw ug gani pagka-kombikto sa kanhi actor nga nahimong presidente human gipalagpot gikan sa Malacañang siyam ka tuig na ang nakalabay.

Human sa maong motorkada dunay gihimong salo-salo diha sa barangay Pasil.

Pipila sa mga residente usab ang nangalipay human personal nga gitunulan og tagsa ka gatos ug duna say tagsa ka libo nila ni Estrada ug Enrile agi og pahalipay.

Dihang mianhi si Estrada dinhi sa Sugbu pipila ka bulan na ang nakalabay gipahibalo niining si Guardo maoy standard bearer sa oposisyon dinhi sa dakbayan.

Si Guardo gikatakdang makig-atbang unya kang Cebu City Mayor Tomas Osmeña sa South District pagka-kongresista. – BANAT NEWS