CEBU, Philippines - Sa ikaduhang higayon milampos gyud pag-eskapo ang usa ka binilanggo sa Cebu City Jail nga nag-atubang og kasong paghupot og ginadiling drugas ug armas. Ang nakaeskapo kagahapon sa mga alas 10:00 sa buntag mao si Arnel Saladaga, lumad nga taga Zamboanga del Sur, ug nagpuyo sa barangay Pasil sa wala pa masikop.
Kahinumdoman nga si Saladaga una nang mieskapo sa City Jail niadtong miaging buwan apan nasakpan ni JO1 Eric Anguit ug napusilan sa buko-buko nga milapos sa tiyan hinungdan nga kini gipatambalan sa Cebu City Medical Center (CCMC).
Matud pa ni City Jail Warden Superintendent Efren Nemenio nga duha ka gwardiya ang iyang gipabantay kang Saladaga sa maong ospital.
Nasayran ni Nemenio nga hanas nang motangtang og posas si Saladaga hinungdan nga ‘leg iron’ ang ilang gitaud sa maong priso.
Apan sa pasiunang imbestigasyon sa Jail Warden kini nagpakita nga migamit si Saladaga og dakong katala pagtangtang sa duha ka bolt sa leg iron. Kini maoy gustong masayran ni Nemenio kung asa ang duha ka gwardiya nga nakalusot man ang katala ug wala mabantayi ang gihimo ni Saladaga.
“Mao gyud nay dugokan sa atong himoong imbistigasyon nga duha man unta ka jail guard ang atong gipabantay atong tawhana,” sumala pa ni Nemenio.
Nagdumili hinoon paghatag sa iyang tubag si Nemenio sa pangutana kung wala bay posibilidad nga nakigkunsabo ang mga gwardiya kang Saladaga.
Nagdumili usab pagbutyag si Nemenio sa pangalan sa duha ka gwardiya nga nagbantay sa pugante samtang kini ipaubos pa sa imbistigasyon.
Apan gipadayag sa Jail Warden nga dako og tulobagon ang duha ka gwardiya kung iyang masuta nga kini adunay nahimong pagpabaya sa ilang katungdanan.
Nagpatabang na usab ang Jail Warden sa kapulisan sa dakbayan ingon man sa lalawigan aron masikop og balik ang nahisgutang pugante.
Nagtuo si Nemenio nga wala pa makagawas sa Sugbu si Saladaga ug malaumon ang Jail Warden nga kini mahibalik ra sa City Jail. (Elly Bolonos) (BANAT NEWS)