Dakay gisaway ni Binghay ug Abalos

CEBU, Philippines - Gisaway nila ni Cebu archdiocese episcopal vicar Msgr. Esteban Binghay ug Sanlakas Cebu Chairman, Fr. Max Abalos, SVD ang baruganan ni Msgr. Achilles Dakay nga nagsupak sa lakang pagdeklarar nga nasudnong bayani si kanhi Presidente Cory Aquino ug ang pagpahigayon og dugang misa ni Cebu City Mayor Tomas Osmeña alang gihapon kang Aquino.

 Sa interview sa DyRF Radyo Fuerza, si Binghay nagkanayon nga dili sama sa pagkaon, ang daghang Santos nga Misa alang kang Aquino dili makaimpatso busa dili angayan nga did-an ang mga tawo nga mohalad og Santos nga Misa alang sa kanhi pangulo.

 Gani mipasiaw pa si Binghay nga nahadlok siya nga tungod sa kadaghan sa Santos nga Misa nga gihalad malapas unya sa langit si Cory Aquino.

 Gipasabot ni Binghay nga bisan og politiko pa ang mopasiugda sa maong Santos nga Misa dili gihapon kini kawad-an og bili tungod kay ang mga maayong intensiyon sa motambong sa maong misa maoy labing importante.

Dugang pa ni Binghay nga mahimong historical ug mabulukon ang Santos nga Misa diha sa Carmelites Monastery tungod kay kanunay man magbisitahan si kanhi Presidente Cory Aquino alang sa pag-ampo.

 Samtang gitataw ni Binghay nga uyon siyang ilhon sa mga Pilipino nga nasudnong bayani si Cory Aquino tungod sa dakong sakripisyo sa kanhi pangulo nasud.

 Apan iyang gitataw nga ipaagi kini sa tukma ug dugay nga proseso sama sa pag-ila sa Simbahang Katoliko sa usa ka santos.

 Samtang si   Fr. Max Abalos nagkanayon nga uyon siyang himuong bayani si Aquino sama sa bana niini nga si kanhi Senador Benigno Ninoy Aquino tungod sa dakong paningkamot nga mabalik sa nasud ang demokrasya.

Matud pa ni Abalos nga walay basehanan si Dakay nga moingon nga mga usisoro lamang ang nakadaghan sa miduyog sa paglubong ni Aquino niadtong Miyerkules.

Kini tungod kay dili makabasa si Dakay sa intensyon sa mga tawo nga wala magsapayan sa ulan aron lamang makapaabot ug makakita man lamang sa patay nga lawas ni Aquino.

 Nagtuo si Abalos nga nagkulang o sayop ang nakuha nga inpormasyon ni Dakay ug midugang nga sigurado siya nga ang baruganan ni Dakay dili susama sa baruganan ni Arsobispo Ricardo Cardinal Vidal. – BANAT NEWS