P2-million reward pagkasikop sa NPA leader gitunol
CEBU, Philippines - Usa ka babayeng impormante sa Central Command nakadawat sa duha ka million ka pesos nga cash reward tungod sa impormasyong maoy nakaingon sa pagkasikop sa usa ka top leader sa New Peoples Army (NPA) didto sa Samar.
Si Lt. Gen. Isagani Cachuela ang hepe sa Central Command maoy personal nga nidunol sa maong ganting 2 milyones ka pesos ngadto sa impormante kagahapon sa buntag diha sa iyang buhatan.
Tungod sa iyang impormasyon natigayon ang joint operation sa Armed Forces of the Philippines (AFP) ug Criminal Investigation and Detection Group (CIDG-7) nga miresulta sa pagkasikop ni Eduardo Sarmiento alias Edok/Ener nga taga University Town, Catarman, Northern Samar.
Si Sarmiento maoy gitumbok sa militar nga secretary sa Eastern Visayas Regional Party Committee nga nagbase sa probinsya sa Samar.
Si Sarmiento didto kini masikop sa Starmall Complex Alabang, Muntinlupa City niadtong Pebrero 24, 2009 base sa mga warrant of arrest gikan sa korte sa kasong arson sa Regional Trial Court branch 29 sa Catbalugan Samar, robbery in band sa Basey, Samar; multiple murder ug multiple frustrated murder sa Paranas Samar.
Si Cachuela nga gikahinabi sa mga tigbalita nagkanayon nga usa kini ka dakong kalampusan sa Central Command ug gobiyerno sa ilang kampanyang mapupos sa 2010 ang insurhensya.
Dako ang pagtuo ni Cachuela nga napiangan gyud ang NPA karon sa Samar tungod sa pagkasikop ni Sarmiento. - Guam Logroño (BANAT NEWS)
- Latest
- Trending
