CEBU, Philippines - Duna nay nakitang paagi ang Cebu City Jail aron paghaylo sa publiko pagbisita sa ilang mga minahal nga nabilanggo pinaagi sa “Jail Bisita Program” matag adlaw'ng Sabado.
Ang mga binilanggo mismo nitukod og mga dance groups alang sa cultural ug modern dances, wala pay labot sa banda, drama group ug uban pa kini aron lingawon ang ilang mga “dalaw.”
Nagtuo si City Jail Warden Superintendent Efren Nemenio nga pinaagi sa Jail Bisita Program, regular nang mobalik ang mga dalaw sa bilanggoan.
“Para ma-encourage gani ang mga bisita ilabi na ang mga relatives sa mga inmates kay usually gud minos kaayo ang dalaw,” nagkanayon si Nemenio.
Nasayran gikan kang Nemenio nga moabot lang sa kinse porsyento ang mga dalaw nga regular nga moduaw sa mga inmates sa City Jail matag semana.
Kini ang hinungdan nga ang ubang binilanggo giingong moinit ug magsipok ang ulo ug mohimo og dili maayong buhat lakip na niini ang pagpangita og away sa ubang bilanggo.
“Kung mominos ang atong dalaw gud kining mga boryong diri moinit ang ulo, mangita og away, ang uban magpasakit sa ilang kaugalingon,” matud pa ni Nemenio.
Nagkanayon si Nemenio nga pinaagi sa Jail Bisita Program, duna nay makalingawan ang mga binilanggo sa pagbansay-bansay matag adlaw.
Ugmang adlawa, gipaabot ang nagkadaiya na usab nga mga presentasyon nga idalit sa mga inmates ngadto sa ilang mga bisita.
Naobserbahan ni Nemenio nga dunay nagkadaiyang mga talento ang mga binilanggo sa City Jail ug kini maoy gusto niyang palamboon.
Sa kasamtangan niingon ang Jail Warden nga ang mga dalaw lang una sa mga inmates ang mahimong makatan-aw sa presentasyon sa mga binilanggo. – BANAT NEWS