Nag-uniporme'g military mitulis sa negosyante

CEBU, Philippines - Tulo ka tulisang nagsul-ob og uniporme sa militar ug nagtaptap sa ilang mga nawong ug nagdala og tag-as nga armas nanulis sa usa ka negosyanteng babaye niadtong Martes sa gabii sa barangay Alegria, lungsod sa Tuburan.

Ang biktima nga si Menchie Tundag, 39, negosyante’g uling ingon man koprasan nagpuyo sa nahisgutang lugar nagkurog nga mi-report sa kapulisan human gitulis sa tulo ka unipormadong tulisan.

Si PO1 Ariel Maravillas, desk officer sa kapulisan sa Tuburan nga gikahinabi sa Banat News nagkanayon ang biktimang si Tundag nakuhaan og P20 mil nga cash, P30 mil nga tseke nga naa sa pangalan sa iyang banang si Primitibo, pito ka tseke sa mga magtutudlo nga mokantidad og P15 mil.

Matud pa ni PO1 Maravillas nga ang biktimang si Tundag gikan kini sa dakbayan sa Sugbu uban sa wala mailhing kauban sakay sa iyang Toyota Hi-Ace.

Dihang naabot sa awa-aw nga dapit sa ilang barangay kalit silang gibabagan sa nagsul-ob og camouflage jacket hinungdan nga ila kining gihunungan apan ang usa nga nagdala’g .45 nga armas mition ug mi-deklarar nga tulis kanila dayong kuha sa bag sa biktima.

Samtang ang kauban niining tulisan nga nagsilbing back-up nagdala usab og wala pa matinong taas nga klase sa armas, ang ikatulong tulisan naglingkod sa motorsiklo nga maoy gigamit sa ilang pag-ikyas sa wala matinong direksyon.

Gisalikway dayon sa kapolisan ang pagdudang mga sakop sa militar ang mga tulisan tungod kay nagtuo silang nagtakuban lang kini ug posibleng mga taga diha ra sila sa nahisgutang lugar tungod kay kabisado nila ang mga lakaw sa biktima sa panahong mag-deliver kini’g mga uling ingon man kopras dinhi sa dakbayan sa Sugbu.

Si Cebu Provincial Police Office direktor Jesus Gaquing nagkanayon nga posibleng mga local boys ra ang mihimo niini ug gigamit lang gyud ang uniporme sa militar. - BANAT NEWS