Gipatay'ng ex-con 'nangalyas' - CCPO

CEBU, Philippines - Nangalyas lang diay sa pangalang Jose Pabillon ang usa ka ex-convict nga bag-ohay lang nga migawas sa Cebu City Jail nga pipila ka oras ang milabay gipatay niadtong Domingo sa gabii.

Sumala pang SPO4 Dennis Moga ang chief investigator sa Homicide Section sa Banat News nga ang gipatay dili si Jose Pabillon kundili si Jerry Jose Parinasan.

Matud pa ni SPO4 Moga diha lang nila kini mahibaw-i dihang ilang gipakigkitaan ang taga punerarya ug nasutang gikuha na sa mga tagtungod ang patay’ng lawas ni Pabillon.

Sumala pang Moga, usa ka babayeng nagpailang Godofreda Parinasan nga nangangkong asawa sa biktima maoy mikuha sa patay’ng lawas niini apan miklarong dili kadto si Jose Pabillon kundili ang iyang banang si Jerry Jose Parinasan ug lumad nga taga Balamban.

Ang maong ginang wala usab mopatim-aw sa buhatan sa kapolisan human niini makuha ang patay’ng lawas aron paghatag og pamahayag kabahin sa pagkatawo sa iyang bana.

Butyag usab ni Moga nga hangtod karun wala pa nila masayri kun si kinsay mipusil sa biktima diha sa sitio Bato sa barangay Ermita ning dakbayan.

Nagduda si Moga nga si Pabillon ug si Parinasan usa ra apan ang pangalang “Jose Pabillon” ray gidala niini apan gitinguha pa nila kini karong subayon sa Cebu City Jail kun si Parinasan nga nagbitbit og release order nga may pangalang “Jose Pabillon” usa ra.

Si Parinasan alyas Jose Pabillon bag-uhay lang nga nakagawas gikan sa Cebu City Jail niadtong Domingo sa hapon apan pagkagabii gipusil kini sa duha ka nagmotorsiklong mga lalaki ginamit ang kalibre .40 nga armas. - Lesley Caminade (BANAT NEWS)