Arroyo nia karon sa Sugbu

CEBU, Philippines - Mobisita dinhi sa Sugbu si Presidente Gloria Macapagal Arroyo karong adlawa aron pagtambong sa usa ka kalihukan sa Kapitolyo nga nagsaulog sa ika-440 ka tuig nga anibersaryo sa pagkatukod sa probinsiya sa Sugbu.

Ang buhatan ni Governor Gwendolyn Garcia mitug-an nga si Presidente Arroyo maoy pinasidunggang dinapit sa One Cebu Expo Opening Ceremony nga gipasiugdahan sa kagamhanan sa lalawigan sa Sugbu diha sa Cebu International Convention Center kon CICC sa dakbayan sa Mandaue.

Gipaabot nga si Presidente Arroyo makigpulong sa mga nagkadaiyang kahugpungan sa mga negosyante dinhi sa Metro Cebu Area ug sa tibuok lalawigan sa Sugbu.

Si presidente Arroyo magpabilin dinhi sa Sugbu hangtud sa adlaw nga Sabado tungod kay motambong pa kini sa kasal sa usa sa anak nga babaye sa gobernador diha sa lungsod sa Liloan.

Ang report nagkanayon nga si Arroyo maoy main principal sponsor sa kasal ni Atty. Christina Garcia ug Liloan mayor Duke Frasco karon adlaw nga Sabado sa simbahan sa Liloan.

Human sa salo-salo sa kasal, giingon si Arroyo mobalik na didto sa kaulohan. – BANAT NEWS