CEBU, Philippines - Gitinguha karon sa Comelec sa dakbayan sa Sugbu nga maoy usa sa unang mapahigayonan sa poll automation demonstration.
Kini human ipahibawo sa ulohang buhatan sa Comelec nga kini mopahigayon og road show sa Precinct Count Optical Scan (PCOS) sa tibuok nasud.
Tuyo sa road show nga makita sa katawhan ang PCOS nga maoy gamiton alang sa pag-computerize na sa eleksyon sa sunod tuig.
Matud pa ni Sarno nga ang iyang buhatan mohangyo ngadto sa Comelec-Manila nga unahon ang dakbayan sa Sugbu pagduaw sa ipahigayong public demonstration.
Giklaro hinoon sa election officer nga iya unang pakighinabian ang ilang provincial supervisor ingon man ang ilang regional director alang niini.
Nasayran nga duha pa lang ka PCOS ang magamit sa Comelec alang sa poll automation demonstration hinungdan nga adunay scheduling nga pagahimuon.
Apan gihangop gihapon ni Sarno ang lakang sa ilang ulohang buhatan tungod kay giingong mahatagan unya og kahigayonan ang publiko pagtan-aw sa operasyon niini.
Ang Comelec miorganisar na og Public Demonstration Coordination Unit (PDCU) nga maoy modawat og mga request alang sa poll automation demonstration.
Ubos sa PCOS system, ang mga botante giingong dili na mosuwat kon dili igo na lang mo-shade sa oval area kilid sa ngalan sa mga kandidato.
Ang balota ipaagi unya sa voting machine nga mao usab ang mobasa ug automatic nga motala ug moihap sa mga boto nga makuha sa mga magpapili. - Elly Bolonos (BANAT NEWS)