Tomas motabang sa Carcelinian

CEBU, Philippines - Nagpanon ang mga sakop sa Carcelinian Homeowners Association (CHOA) ngadto sa Cebu City Hall niadtong Martes ug nangayo og tabang kang mayor Tomas Osmeña.

Kini human sila makadawat ug notisya gikan sa kagamhanan sa lalawigan nga sila papahawaon na sa ilang giukopahan nga luna.

Ang mga sakop sa CHOA maoy nag-ukopar sa luyong bahin sa karaang Cebu Provincial Detention and Rehabilitation Center diha sa M.J. Cuenco Avenue ning siyudad.

Matud sa presidente sa CHOA nga si Potenciano Adovas Jr., nga sila gihatagan lang sa probinsya og hangtud sa buwan sa Oktobre pagpahawa sa ilang nahimutangan.

Kini tungod kay giingong gamiton na sa Kapitolyo ang luna nga ilang giukopahan nga mao karon ang ilang gikabalaka nga kawad-an na og pinuy-anan.

Matud ni Adobas nga wala makawang ang ilang pagdangop ngadto sa City government tungod kay giingong dunay gipasalig kanila si Osmeña.

Miingon si Adobas nga gipasaligan sila ni Osmeña nga hatagan og legal assistance sa higayong papahawaon sila sa Kapitolyo gikan sa ilang gipuy-an karon.

Midugang si Adobas nga ang pasalig sa mayor maoy nakapabuhi sa ilang paglaom nga dili sila mapahawa gikan sa ilang nahimutangan karon ug mituo sila ug misalig sa kalig-on ug kaisog sa mayor nga makigsangka batok sa taga Kapitolyo.

Matud sa presidente sa CHOA nga gitambagan usab ni Osmeña nga dili papahawaon sa ilang pwesto kung walay kamandoan gikan sa hukmanan.

Nasayran nga adunay 30 ka panimalay ang nagbarug sa nahisgutang luna nga dunay gibana-banang kapin sa 800 ka metro kwadrado ang gidak-on.

Gusto sa apektadong mga molupyo nga ilang paliton ang giukopahan nilang luna ug andam silang modata-data niini ngadto sa kagamhanang probinsyal.

Kini tungod kay ang ubang mga nagpuyo sa maong lugar , diha na sa maong dapit sukad pa sa dekada 50.

Nasayran nga gipabayad og abang sa Kapitolyo ang mga nanimuyo sa maong luna kaniadto apan kini giingong nahunong atol sa pamunoan ni kanhi gobernador Lito Osmeña. -  BANAT NEWS