Heightened alert atol sa lubong

CEBU, Philippines - Ipaubos sa kapulisan sa heightened alert ang kinatibuk-ang Central Visayas sugod sa alas 7:00 sa buntag karong adlawa dungan sa paglubong na sa patay’ng lawas ni kanhi Presidente Corazon Aquino.

Si Chief Supt. Lani-O Nerez, ang direktor sa Police Regional Office (PRO-7) miisa sa alert level aron di makakita og higayon ang mga kalaban sa gobiyerno sa pagpahimulos sa higayon samtang nagbangutan ang publiko.

Partikular nga gitumbok niini ang lugar diha sa Negros nga kusog pa kaayo ang presensiya usab sa mga rebeldeng New Peoples Army.

Karong adlawa dunay Santos nga Misa nga ipahigayon alas 8 sa buntag diha sa PRO7 pahinungod ug pagtahod sa mitaliwang kanhi presidente nga maoy ilang kanhi commander in chief kaniadtong dekada 80.

Mibutyag si Nerez nga niadtong usa pa siya ka kapitan usa siya sa gipatawag kaniadto ni Aquino dihang nilingkod na kining presidente ug gipangayoan og panahom kun unsay problema nila sa ilang trabaho sa kapolisan.

Kini liwas na sa kudeta niadtong 1989 gumikan sa sunod-sunod nga paglusad og kudeta sa mga right-wing rebels nga gipasiugdahan sa militar.

Matud pa niini nga duha lang sila nga nag-ranggo og kapitan niadtong higayuna nga giimbitar gikan dinhi sa rehiyon ug mapasigarbuhong ilaha gyung napadangat ang panginahanglan nila sa mga benepisyo, housing program ug mapadali paghatag ang mga benepisyo niadtong ilang mga kaubang nitaliwan. – BANAT NEWS