Balaodnon vs abortion ni Santiago gikataw-an lang

CEBU, Philippines - Gihulagway sa usa ka pro-life advocate nga dakong kataw-anan ang gipalabang nga balaudnon sa usa ka partylist representative nga makigbatok sa abortion.

Si Rep. Narciso Santiago sa Alliance for Rural Concerns niduso og balaudnon nga magpahamtang og mas bug-at nga silot sa mga health professionals (doctors, nurses, midwives) ug sa uban pang mga health workers nga malambigit sa aborsyon.

Lakip sa gitinguha sa kongresista nga mapahamtangan og bug-at nga silot mao ang mga pharmacists nga mobaligya sa gitawag og abortifacients nga walay resita gikan sa doktor.

Apan ang country director sa Human Life International (HLI) nga si Rene Josef Bullecer miingon nga kataw-anan ang gihimo ni Santiago tungod kay kini giingong maoy usa sa proponent sa Reproductive Health Bill nga nagtugot og accessibility sa mga abortifacients.

“Kataw-anan kaayo hunahunaon nga si Congressman Santiago is filing a bill which is contrary sa lain nilang balaudnon, ang Reproductive Health Bill nga nagtugot og all out accessibility sa gitawag nato og abortifacients,” sumala ni Bullecer.

Taliwa niini miingon ang country director sa HLI nga ila gihapong gihangop ang balaudnon sa kongresista bisan kung sila dunay pagduda nga kini dili maaprubahan.

“We welcome that move pero mura og dili kaayo na mukagar considering lagi nga siya may usa sa mga proponent sa Reproductive Health Care Act,” matud pa ni Bullecer.

Ubos sa Revised Penal Code kadtong mga medical professionals nga mo-perform og abortion mag-atubang og 12 ngadto sa 20 ka tuig nga pagkabilanggo. – BANAT NEWS