Kampong Radaza wa mahulga sa oposisyon

CEBU, Philippines - Wala mahulga ang kampo ni incumbent Lapulapu City Mayor Arturo Radaza sa lakang panaghiusa sa mga kandidato pagka-mayor sa oposisyon sa dakbayan sa Lapulapu sumala pa ni Lapulapu City Association of Barangay Council kon ABC president ug maoy kapitan sa barangay Pajo Leo Mercado.

Si Mercado sa pakighinabi sa Banat News mibutyag nga daan na silang nasayod nga maghiusa ang oposisyon aron atbangan si Radaza.

Dako ang pagsalig ni Mercado nga lisod pildehon ang kapikas ni Radaza nga si Paz Radaza bisan pa kinsay iatbang sa oposisyon.

Matud pa ni Mercado nasayod na silang daan sa mga meetings tali nila ni Kon. Jumard ‘Ahong’ Chan ug sa oposisyon ingon man ang ilang planong mobiya sa kampo ni Radaza.

Si Chan nga nahinabi usab sa Banat News mihimakak nga dunay mga panagtagbo tali kaniya ug sa mga kontra ni Radaza sa politika ug kining tanan pagdaut lamang kaniya aron maguba ang ilang relasyon ni Mayor Radaza.

Matud pa ni Chan nga maong mibiya siya sa kampo ni Radaza gumikan kay gikuha sa mga suod sa mayor ang committee chairmanship niya sa konseho sa dakbayan sa Lapulapu. - Bong Soriano (BANAT NEWS)