Magtutudlo gigarantiyahan og scholarship

CEBU, Philippines - Nagtanyag karon si 6th District Representative Nerissa Soon-Ruiz og scholarship grant ngadto sa mga magtutudlo sa ika-unom nga distrito sa lalawigan sa Sugbo ug gigahinan kini niya og P500,000.

Kini iyang gihimo aron kapalawman pa ang nakat—onan sa mga magtutodlo sa iyang distrito pinaagi sa paghatag og kasinatian sa labing bag-ong methodology sa pagtudlo sa ilang mga estudyante.

Si Kongresista Soon-Ruiz mipasabot nga ang iyang paghatag og scholarship grant ngadto sa mga magtutudlo maoy makapahingpit sa ilang kurso nga nakab-ot sa ilang pag- eskwela ug mahimo kining basehanan sa ilang promosyon sa ilang propesyon.

“Daghan sa atong mga magtutdlo ang gusto pa gyod untang mopadayon sa ilang pagtungha,” nagkanayon si Kongresista Soon-Ruiz sa iyang press statement. “Pero, tungod sa kawad-on ug kalisod sa kahimtang dili kini makapadayon ug kuntinto na lamang kini sa naangkon nilang estado isip ordinaryo lamang nga magtutudlo.

Sa nasayran sa Banat News  ang edukasyon sa ikaunom nga   distrito sa Sugbo gihatagan og dakong pagtagad ni Kongresista Soon-Ruiz .

Naglakip niini ang dugang pagpatukod og dugang mga edipisyo ngadto sa mga publikong tulunghaan sa kabarangayan sa tinguha nga dugang lawak saringan ang magamit sa mga tinun-an. - Romeo T. Limpangog (BANAT NEWS)