CEBU, Philippines - Gibana-banang usa ka libo ka punoan sa Marijuana ang gilarot sa mga kapolisan didto sa sitio Butong, barangay Alawihaw lungsod sa Badian ala-6:45 sa buntag kagahapon.
Ang pagpanglarot gipanguluhan ni Police Insp. Samuel Panilagaw kauban ang intelligence officer sa 2nd Company sa Regional Mobile Group nga si Cansiano Linos ug duha ka teams sa ilang unit.
Sumala pang Panilagaw , ang gitamnan sa mga Marijuana luna nga gipanag-iya sa gobiyerno nga may gilapdong 500 ngadto na sa 600 square meters diha mahimutang sa tumoy sa bukid sa maong sitio.
Si Panilagaw sa pakighinabi sa Banat News nga nakadawat sila og impormasyon kabahin sa usa ka ginganlan og “Abling” nga nananom og mga Marijuana sa maong barangay.
Ang maong nananom wala nila maabti diha sa maong dapit atol nga ila kining gironda kagahapon sa buntag, apan na-recover nila ang bawon niini nga gituohang gibiyaan sa suspek pagkasayod nga may nangabot nga mga polis.
Gibana-banang nagkantidad og kapin sa tunga sa milyon ang kantidad sa maong mga tanom kun mahalin sa merkado sa mga addict. - BANAT NEWS