Bana sa policewoman gibanhigan patay

CEBU, Philippines - Patay ang bana sa usa ka policewoman nga usa ka lineman sa Philippine Long Distance and Telecommunication Company human kini gibanhigan sa tulo ka mga lalaking sakay og motorsiklo samtang paingon nang mopauli gikan nga nanari sa sitio Talamnan barangay Sto. Niño sa lungsod sa Malabuyoc niadtong Domingo sa alas 4:00 sa hapon.

Ang biktimang patay nang nahidangat sa tambalanan human mabulit og samad pinusilan ang kalawasan ug ulo mao si James Leocar Camay, 42, nadestirno sa PLDT sa Talisay, molupyo sa Poblacion, Ginatilan nga bana ni PO3 Raquel Camay nga nadestino sa Cebu City Police Office (CCPO).

Samtang ang laing biktima nga naangol mao ang iyang kaubang si John Calvin Dumaboc, 31, molupyo sa nahisgutang lugar nga nakaangkon og samad pinusilan sa walang bahin sa paa.

Gawas sa mga napusilan, naangol usab sila si Godofredo Amancio, 64; Alberto Rosagaran, 24; Joselito Mejares; Votros Solatorio ug ang 14-anyos nga si Rey Vincent Quintana pulos mga molupyo sa Poblacion, Ginatilan, ang lima nakaangkon og mga pangos ug bukol sa kalawasan human madasmagi sa sakyanan ni Camay diha sa daplin sa dalan human kini nawad-an og kontrol human mapusili.

Matud pa ni PO2 Santiago Anticristo sa Malabuyoc Police Station sa dihang nahinabi sa Banat News ang mga biktima gikan pang nanari sa lungsod sa Malabuyoc ug paingon nang mopauli sakay sa multicab ni Camay.

Gitumbok nga namusil kanila mao ang tulo ka wala mailhing lalaking sakay sa motorsiklo nga giingong nagsunod nang daan kanila ug pag-abot sa maong lugar midiretso og rakrak sa multicab.

Si Camay nawad-an og kontrol ug napidpid sa kilid sa pangpang human niini gikatahong mibalik sa agi ang mga mamumuno ug giusban sa pagpusil si Camay una pa misirit palayo.

Ang mga molupyo na sa maong lugar nga nakadungog sa buto-buto sa armas maoy mitabang sa mga biktima paghatud sa M.J. Cuenco Memorial Hospital sa lungsod apan gideklarar nga dead on arrival si Camay.

Nakapunit og 16 ka mga kabhang sa bala sa 9mm, pito ka kabhang sa bala sa kalibre .45 ug usa ka magazine sa K9 machine pistol diha sa crime nga gituohang iya sa mga suspek.

Ang kapolisan padayon pa sa ilang imbestigasyon pagtumbok sa mga suspek ug sa motibo sa krimen ug wala isalikway sa nagpadayong pakisusi ang posibilidad nga dunay gikabingkil   si Camay atol sa pagpanari niini og ba kaha personal nga kasungian. (Darrel Carumba)   (BANAT NEWS)