1 kilo shabu nahanaw

CEBU, Philippines - Tulo ka mga sakop sa Cebu City Police (CCPO) ipa-ubos sa imbestigasyon human sa pasangil nga wala gi-blotter ang pagkasikop sa usa ka Muslim nga negosyante nga nadakpan niadtong milabay’ng bulan ug nakuhaan og usa ka kilo nga shabu. Ang usa ka kilo nga shabu wala na masayri asa paingon.

Base sa impormasyon nga nadawat sa DySS Super Radio usa ka impormante ang mipahibalo nga niadtong Hulyo 19, ang negosyante nga Muslim nga gidakop sa mga sakop sa CCPO sulod sa usa ka kan-anan sa may dalan Escario, barangay Capitol Site ning dakbayan.

Si Sr. Supt. Patrocinio Comendador, direktor sa kapolisan sa dakbayan sa Sugbo nga gikahinabi sa DySS ug Banat News nagkanayon nga iyang ipatawag aron ipa-imbestigar sila si SPO1 Frederick Ybañez, SPO1 Cesar Pandong ug PO1 Roy Veloso pulos mga sakop sa Investigation Detection and Management Branch (IDMB) nga ubos sa pagdumala ni Supt. Paul Labra II.

Matud pa ni Comendador nga iyang ipa-verify ang maong report tungod kay dili usab ikalikay nga dunay mga tawo nga “polluted” og mga panghuna-huna nga dauton ang mga sakop sa CCPO.

Kini kun mapiit na sa ilang mga ilegal nga kalihukan hinungdan nga iyang ipasusi ni Supt. Labra ang maong report aron masuta kun unsa ka tinuod ang maong mga pasangil batok sa iyang mga sakop.

Gihulagway niini nga seryoso kaayo ang maong alegasyon hinungdan nga dili usab niya isalikway ang mga posibilidad nga dunay mga polis nga nakahimo niini apan aron malimpiyo ang ilang imahen duna gyo'y imbestigasyon.

“Duna gyud seguro'y involvement ang maong tawo dako ang posibilidad nga didto siya sa maong kan-anan ug kaubanan niini ang gikatahong gidakop nga nagdala sa drugas kay nakakita man siya,” sumala pa ni Comendador.

Iyang gihagit ang maong impormante nga mopatim-aw ug mo-testigos aron usab makatabang sa ilang imbestigasyon sa kaso nga mapadali ug matumbok ang tinuoray’ng nahitabo atol sa maong adlaw.

Gumikan kay alang kaniya nga kun dunay gidakop sulod sa usa ka kan-anan posible gyud nga dunay komosyon nga mahitabo ug ang mga staff sa maong kan-anan nakahibalo usab niini.

Hinuon usab sa iyang kamanduan nga ipasusi usab ang maong kan-anan aron matino kun duna ba gayo'y nahitabong dakop niadtong Hulyo 19 sa milabay’ng bulan.

Gidugang pa niini nga dili gyud makalingkawas sa imbestigasyon ang tulo ka mga polis nga gipasanginlan tungod kay iyang ipaseguro ni Supt. Labra nga makatubag sa mga pasangil nga makahatag og buling sa CCPO.   (BANAT NEWS)