CEBU, Philippines - Mipasiugda og usa ka Santos nga Misa ang kagamhanan sa dakbayan sa Sugbu kagahapong adlawa alang sa kapahulayang dayon ni kanhi presidente Cory Aquino.
Ang Holy Mass gitambungan sa pipila ka mga opisyal sa siyudad ug sa ubang mga kawani sa City Hall ingon man sa mga barangay kapitan.
Sa iyang wali, gipadayag ni Fr. Dave Villaceran sa Cebu Metropolitan Cathedral nga si Cory simbolo sa kahiusahan sa nasud.
Samtang laing Santos nga Misa ang pasiugdahan usab sa kagamhanan sa dakbayan karong Biyernes alang gihapon sa kapahulayang dayon sa kalag sa kanhi presidente.
Apan karong umaabot nga Huwebes ang Artsidiyosesis sa Sugbu mopasiugda usab og usa ka Santos nga Misa alang gihapon kang Cory.
Ang Arsobispo sa Sugbo nga si Ricardo Cardinal Vidal mao mismo ang mosaulog sa Santos nga Misa nga gipaabot nga tambungan sa liboan ka mga Sugbuanon.
Sa susamang kalamboan nagplano usab si Mayor Tomas Osmeña pagpasiugda og Santos nga Misa sa atubangang bahin sa Carmelite Monastery.
Kini alang gihapon sa kanhi presidente nga midangop sa nahisgutang monasteryo nga gi-ubanan ni Kongresista Antonio Cuenco sa dihang misugod pag-alsa ang katawhan kaniadto batok sa diktadoryang rehimen ni Ferdinand Marcos.
Plano ni Osmeña nga moimbitar og sakop sa pamilya ni Cory nga motambong sa ipahigayong Holy Mass diin sirad-an ang dalan Juan Luna nga nahimutangan sa Carmelite.
Sa pikas bahin, nagplano usab ang mayor pagtukod og monumento sa kanhi Kawit Island diha sa South Road Properties (SRP) alang kang Ninoy ug Cory Aquino.
Ang monumento pagatawgon unya og “Freedom Monument” nga butangan sa estatuwa nilang Ninoy ug Cory Aquino.
Mas pabor si Osmeña nga butangan og munumento ang magtiayon itandi sa paghatag niini og street name dinhi sa dakbayan.
Gipadayag sa mayor nga dili ordinaryong monumento ang iyang plano nga tukuron tungod kay kini giingong butangan og “eternal flame”. (Elly Bolonos) (BANAT NEWS)