Tawag sa cellphone ipaagi sa Metrohan

CEBU, Philippines - Misugot na ang mga wireless telecommunication companies sa nasud nga ipatuman ang six-second per pulse billing system alang sa mga tawag sa cellphone sugod karong bulan sa Disyembre.

Si Senador Mar Roxas nga maoy tsirman sa Senate Trade and Commerce Committee, mikutlo sa pamahayag sa acting National Telecommunication Commission chairman, Deputy Commissioner Douglas Malilin gihinay-hinayan na og pagpatuman ang billing system per-second sa mga cellphone.

“This is good news for the 75 million cellular phone user in the country, especially pre-paid consumers,” matud pang Roxas. Nasuta nga 80 porsiyento sa cellphone users sa nasud migamit og pre-paid.

Ang senador mipahimangno sa NTC nga higpitan sa iyang komitiba ang pagmonitor sa mga reklamo sa cellphone users kun tinuod bang gisunod kini sa mga telecommunications companies.

Si Malilin mibutyag nga ang Globe, Smart ug Sun Cellular misugot sa maong gisugyot nga six-second per pulse billing system nga mao na usab karo’y gipatuman sa mga service providers sa ubang kanasuran.

Ang mga telecommunications companies gitagalan og 120 ka adlaw nga mopatuman niini ug kini mahitabo sa unang semana sa bulan sa Disyembre.

Wala pa usab hinuon maklaro kun pilay rate sa matag segundo sa tawag sa cellphone sanglit duna pay 10 ka adlaw nga gihatag ang NTC sa mga kumpanya sa paghatag og kaugalingon nilang pagbana-bana.

Gawas pa niini giawhag usab ang NTC sa pagsigurong gisunod niining maong mga telecommunications companies ang bag-ong guidelines sa extension sa pre-paid load expiry dates ug mga walay pulos nga mga promo text sa maong mga kumpanya. (Lesley Caminade)   (BANAT NEWS)