Nahanaw nga mga semento imbestigahon

CEBU, Philippines - Nimando si Gov. Gwendolyn Garcia og imbestigasyon kalabot sa gikatahong pagkahanaw sa kapin sa 2 mil ka sakong semento alang unta sa pagtukod sa dike sa coastal areas sa dakbayan sa Talisay.

Kini mahibaw-i nga ang maong gidaghanon sa semento gikan sa kagamhanan sa lalawigan sa Sugbu nga gidonar ngadto sa kagamhanan sa siyudad sa Talisay mitumaw nga wala magamit.

Sigon sa report sa DyRF, si Garcia nagkanayon   nga dili tinuod ang mitumaw nga report nga wala makompleto paghatag sa Kapitolyo ang 5,900 ka mga sakong semento ngadto sa Talisay City.

Gani si Provincial Planning and Development Office head, Engr. Rodolfo Quiroga nitumbok nga may mga dokumento silang ikapakita sa pagsuporta sa gisulti sa gobernadora nga 5,900 ka bags sa semento ang nahatud sa Talisay alang sa pagtukod sa dike ug seawall.

Ang gobernadora mibahad nga manubag gyud ang mga opisyales sa nahisgutang siyudad nga maoy nipirma sa Memorandum of Agreement kay kapin ra man sa 3 mil ang nagamit nga semento ug wala pa hisayri kun asa na ang kapin sa 2 mil ka sakong semento.

Samtang si Garcia nimando usab sa Provincial Social Welfare Office nga hatagan og ayuda ang mga naapektohan sa dagkong balod nga mga residente sa sitio Litmon barangay Dumlog, Talisay city sa labing daling panahon.

Ang gobernadora miingon nga ang ihatag ngadto sa mga biktima sa dakong balod didto sa Talisay mao ang bugas, sardinas, gatas, mga senina ug uban pang gikinahanglanon.

Si Mayor Socrates Fernandez sa iyang bahin mipasalig nga pangitaon gyud niya ang husay sa maong mga nahanaw nga semento, gihatud na usab ang mga hinabang nga pagkaon alang sa 56 ka pamilyang naapektahan diha sa sitio Litmon sa barangay Dumlog kansang kabalayan nabanlas sa paghapak sa dagkong bawod niadtong adlaw’ng Domingo.

Si Fernandez mimando na usab sa city engineers nga palimpyuhan ang sitio Aromahan aron maoy kabalhinan sa naapektahang mga molupyo samtang gibutyag usab sa mayor nga mohatag og 50 ka sakong bugas si First District Rep. Eduardo Gullas.

Nagplano usab si Konsehal Shirley Belleza sa pagpasar og resolusyon nga magdeklarar sa maong barangay nga ubos sa state of calamity aron makapagawas og P78 mil nga pundong hinabang sa matag pamilya. (Uban sa report nila ni Rey Pasaporte ug Darrel Carumba)   (BANAT NEWS)